(रत्नागिरी /प्रतिनिधी)
सार्वजनिक ठिकाणी मद्यप्राशन करून नागरिकांना त्रास होण्याची शक्यता निर्माण करणाऱ्या व्यक्तीविरोधात पूर्णगड पोलिसांनी कारवाईचा बडगा उगारला आहे. वायंगण फाटा-कोळंबे मार्गालगत कातळावर बसून विनापरवाना मद्यप्राशन करणाऱ्या सचिन तानाजी सुर्वे (५०, रा. गणेशनगर, फणसोप, रत्नागिरी) याच्याविरोधात गुन्हा दाखल करण्यात आला आहे. ९ सप्टेंबर रोजी रात्री साडेनऊच्या सुमारास ही कारवाई करण्यात आली.
पोलिस कॉन्स्टेबल अविनाश पोळ यांनी याबाबत पूर्णगड पोलिस ठाण्यात तक्रार दाखल केली. त्यानुसार, वायंगण फाटा-कोळंबे मार्गालगत कातळाच्या ठिकाणी सुर्वे हा सार्वजनिक ठिकाणी मद्यप्राशन करताना पोलिसांना आढळून आला. पोलिसांनी केलेल्या तपासणीत त्याच्याकडे सार्वजनिक ठिकाणी मद्यप्राशन करण्यासंदर्भातील कोणताही परवाना नसल्याचे निदर्शनास आले. सार्वजनिक ठिकाणी अशा प्रकारे मद्यप्राशन केल्याने परिसरातील नागरिकांना त्रास होण्याबरोबरच कायदा व सुव्यवस्थेचा प्रश्न निर्माण होण्याची शक्यता असते. त्यामुळे पोलिसांनी संबंधित प्रकाराची गंभीर दखल घेत सुर्वेविरोधात कायदेशीर कारवाई केली.
रस्त्यालगत, कातळावर किंवा अन्य सार्वजनिक ठिकाणी मद्यप्राशन करण्याचे प्रकार आढळल्यास त्याचा परिणाम परिसरातील नागरिकांवर आणि सार्वजनिक वातावरणावर होऊ शकतो. त्यामुळे अशा प्रकारांना वेळीच आळा घालण्यासाठी पोलिसांकडून गस्त आणि कारवाई वाढविण्यात येत आहे.
