(रत्नागिरी / प्रतिनिधी)
गणेशोत्सवासाठी कोकणात दाखल होणाऱ्या चाकरमान्यांची वाढती गर्दी लक्षात घेऊन मध्य रेल्वेने मुंबई-मडगाव दरम्यान चार अतिरिक्त गणपती विशेष फेऱ्या चालविण्याचा निर्णय घेतला आहे. छत्रपती शिवाजी महाराज टर्मिनस ते मडगाव आणि मडगाव ते छत्रपती शिवाजी महाराज टर्मिनसदरम्यान या विशेष गाड्यांच्या प्रत्येकी दोन फेऱ्या होणार असल्याने गणेशोत्सवाच्या काळात कोकणाकडे प्रवास करणाऱ्या प्रवाशांना मोठा दिलासा मिळणार आहे.
रेल्वेच्या माहितीनुसार, गाडी क्रमांक ०१००७ सीएसएमटी-मडगाव गणपती विशेष ११ आणि १३ सप्टेंबर रोजी मध्यरात्री १२.४० वाजता छत्रपती शिवाजी महाराज टर्मिनसहून सुटेल. ही गाडी त्याच दिवशी दुपारी ३.३० वाजता मडगाव येथे पोहोचेल. परतीच्या प्रवासात गाडी क्रमांक ०१००८ मडगाव-सीएसएमटी गणपती विशेष ११ आणि १३ सप्टेंबर रोजी मडगावहून सायंकाळी ४.३० वाजता सुटेल आणि दुसऱ्या दिवशी सकाळी ८.१५ वाजता छत्रपती शिवाजी महाराज टर्मिनस येथे पोहोचेल.
मुंबई ते मडगाव मार्गावर धावणाऱ्या या विशेष गाड्यांना कोकणातील प्रमुख स्थानकांवर थांबे देण्यात आले आहेत. पनवेल, पेण, रोहा, माणगाव, वीर, खेड, चिपळूण, सावर्डा, अरवली रोड, संगमेश्वर रोड, रत्नागिरी, आडवली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि थिविम आदी स्थानकांचा त्यामध्ये समावेश आहे. त्यामुळे मुंबईसह उपनगरातून कोकणातील विविध तालुक्यांमध्ये गणेशोत्सवासाठी येणाऱ्या प्रवाशांना नियमित गाड्यांव्यतिरिक्त आणखी एक पर्याय उपलब्ध होणार आहे. या गणपती विशेष गाडीला एकूण २२ डबे असतील. त्यामध्ये दोन एसी ३-टियर, १२ स्लीपर, सहा जनरल सेकंड क्लास तसेच दोन सेकंड सीटिंग-कम-गार्ड ब्रेक व्हॅन डब्यांचा समावेश आहे. त्यामुळे प्रवाशांना आपल्या सोयी आणि आर्थिक क्षमतेनुसार एसी, स्लीपर किंवा सामान्य श्रेणीतील प्रवासाचा पर्याय उपलब्ध होणार आहे.
गाडी क्रमांक ०१००७ साठी आरक्षणाची प्रक्रिया २९ ऑगस्टपासून सुरू करण्यात आली आहे. आरक्षित प्रवासासाठी आयआरसीटीसी संकेतस्थळ तसेच रेलवन अॅपचा वापर करता येणार आहे. अनारक्षित डब्यांमधून प्रवास करणाऱ्या प्रवाशांना यूटीएस प्रणालीद्वारे तिकीट काढता येणार आहे. गणेशोत्सवाच्या काळात मुंबईहून कोकण आणि गोव्याकडे जाणाऱ्या प्रवाशांची संख्या मोठ्या प्रमाणात वाढते. त्यातच नियमित रेल्वेगाड्यांवरील ताण वाढत असल्याने मध्य रेल्वेने घेतलेल्या या निर्णयामुळे अतिरिक्त प्रवासी क्षमता उपलब्ध होऊन गर्दीचा काही प्रमाणात भार हलका होण्याची शक्यता आहे. गणेशोत्सवासाठी गावाकडे परतणाऱ्या चाकरमान्यांसाठी रेल्वेच्या या अतिरिक्त सेवांमुळे प्रवासाचे नियोजन करणे अधिक सुलभ होणार असून, कोकणच्या गणेशोत्सवी प्रवासाला विशेष रेल्वेचा आधार मिळणार आहे.
