(चिपळूण )
चिपळूण शहरातील बहादूरशेख नाका परिसरात वाहतूक नियमन करत असताना पोलिसांनी एका संशयित तरुणाला मोटारसायकलसह ताब्यात घेतले आहे. मोटारसायकलच्या मालकीबाबत समाधानकारक माहिती किंवा कागदपत्रे सादर न करू शकल्याने संबंधित तरुणाविरुद्ध महाराष्ट्र पोलीस कायद्यानुसार गुन्हा दाखल करण्यात आला आहे.
पोलिसांकडून मिळालेल्या माहितीनुसार, ५ जानेवारी २०२६ रोजी सायंकाळी सुमारे ४ वाजता बहादूरशेख येथे कृषी मेळाव्याचे आयोजन करण्यात आले होते. या पार्श्वभूमीवर बहादूरशेख नाका ते कराडकडे जाणाऱ्या मार्गावर वाहतूक व्यवस्थापनाची जबाबदारी चिपळूण पोलीस ठाण्याचे पोलीस कॉन्स्टेबल शैलेश शांताराम वनगे पार पाडत होते.
यावेळी राजाकुमार दिनेश मंडल (वय २०, रा. सुखवासी, जि. मधुबनी, राज्य बिहार) हा तरुण एम.एच. ०८ बी.जे. ०८४७ क्रमांकाच्या मोटारसायकलसह संशयास्पद स्थितीत आढळून आला. पोलिसांनी त्याला थांबवून वाहनाच्या मालकीबाबत चौकशी केली असता, त्याच्याकडे कोणतीही वैध कागदपत्रे आढळून आली नाहीत.
मोटारसायकल चोरीची असण्याची शक्यता लक्षात घेऊन पोलिसांनी ती ताब्यात घेतली. आरोपी राजाकुमार मंडल याच्याविरुद्ध महाराष्ट्र पोलीस कायदा कलम १२४ अंतर्गत गुन्हा दाखल करण्यात आला आहे. या प्रकरणाची नोंद ५ जानेवारी रोजी सायंकाळी ७ वाजता चिपळूण पोलीस ठाण्यात करण्यात आली असून, पुढील तपास पोलीस करत आहेत.
