(धाराशिव)
श्री क्षेत्र तुळजापुरात श्री तुळजाभवानी देवींच्या शाकंभरी नवरात्र महोत्सवास रविवारी घटस्थापनेने भक्तिभावात प्रारंभ झाला. दुपारी १२ वाजता मुख्य यजमान उल्हास अनंतराव कागदे यांच्या हस्ते मंदिरातील गणेश विहारात सपत्नीक विधीवत घटस्थापना करण्यात आली. यासह सात दिवस चालणाऱ्या शाकंभरी नवरात्र महोत्सवाची अधिकृत सुरुवात झाली.
घटस्थापनेच्या वेळी मंत्रोच्चार, धार्मिक विधी आणि भक्तीभावाने संपूर्ण मंदिर परिसर मंगलमय झाला होता. या प्रसंगी तहसीलदार तथा मंदिर व्यवस्थापक (प्रशासन) माया माने, महंत तुकोजी बुवा, महंत चिलोजी बुवा, महंत वाकोजी बुवा, उपाध्ये सुनीत (बंडू) पाठक, पुजारी मंडळाचे अध्यक्ष विपिन शिंदे, अमराराजे कदम, अनंत कोंडो, लेखाधिकारी संतोष भेंकी, सहायक धार्मिक व्यवस्थापक अनुप ढमाले, रामेश्वर वाले यांच्यासह मंदिर संस्थानचे अधिकारी, कर्मचारी, पुजारी बांधव आणि भाविक मोठ्या संख्येने उपस्थित होते.
श्री तुळजाभवानी देवींचे दरवर्षी दोन प्रमुख नवरात्र उत्सव साजरे केले जातात. अश्विन महिन्यातील शारदीय नवरात्र आणि पौष महिन्यातील शाकंभरी नवरात्र हे दोन्ही उत्सव भाविकांसाठी विशेष महत्त्वाचे आहेत. शाकंभरी नवरात्र उत्सवाला तुळजापुरात ‘धाकटा दसरा’ म्हणूनही ओळखले जाते.
यापूर्वी गेल्या आठ दिवसांपासून सुरू असलेली देवींची मंचकी निद्रा संपवून आज पहाटे पौष शुक्ल अष्टमीच्या शुभमुहूर्तावर श्री तुळजाभवानी देवींची सिंहासनावर विधीवत प्रतिष्ठापना करण्यात आली.
सात दिवस चालणाऱ्या या शाकंभरी नवरात्र महोत्सवाची सांगता ३ जानेवारी रोजी शाकंभरी पौर्णिमेला दुपारी १२ वाजता पूर्णाहुती आणि त्यानंतर घटोत्थापनाने होणार आहे.
शाकंभरी नवरात्रातील अलंकार महापूजांचे वेळापत्रक:
२९ डिसेंबर – रथ अलंकार महापूजा
३० डिसेंबर – मुरली अलंकार महापूजा
३१ डिसेंबर – शेषशाही अलंकार महापूजा, सकाळी ७ वाजता जलयात्रा
१ जानेवारी – भवानी तलवार अलंकार महापूजा
२ जानेवारी – महिषासुरमर्दिनी अलंकार महापूजा
शाकंभरी नवरात्र काळात दररोज रात्री श्री तुळजाभवानी देवींचा छबीना (मिरवणूक) निघणार आहे. त्यामुळे संपूर्ण तुळजापूर नगरी भक्ती, श्रद्धा आणि उत्सवाच्या वातावरणाने भारून गेली आहे.
