( पुणे )
कोंढवा परिसरातून अटक करण्यात आलेल्या दहशतवादी जुबेर हंगरगेकर याचे अफगाणिस्तान आणि हाँगकाँगमधील आंतरराष्ट्रीय दहशतवादी नेटवर्कशी थेट संबंध असल्याची धक्कादायक माहिती समोर आली आहे. एटीएसच्या तपासात जुबेरच्या मोबाईलमधून भारतविरोधी अनेक आक्षेपार्ह संभाषणे आढळून आली असून ती परदेशात बसलेल्या व्यक्तींशी झाल्याचे स्पष्ट झाले आहे.
जुबेरच्या टेलिग्राम ग्रुपमधील एकूण १०२ आयडीपैकी चार आयपी अॅड्रेस तपास यंत्रणांना मिळाले आहेत. त्यापैकी तीन आयपी अॅड्रेस अफगाणिस्तानचे तर एक आयपी अॅड्रेस हाँगकाँगचे असल्याचे उघड झाले आहे. यामुळे जुबेरचा आंतरराष्ट्रीय दहशतवादी मॉड्यूल्सशी थेट संपर्क असल्याचा एटीएसचा ठोस दावा आहे.
राष्ट्रविरोधी कृत्यात सहभागी असल्याच्या संशयावरून अटक झाल्यानंतर न्यायालयीन कोठडीत असलेल्या जुबेरला एटीएसने पुन्हा ताब्यात घेतले. शिवाजीनगर न्यायालयात हजर केले असता विशेष न्यायाधीश पी. वाय. लाडेकर यांनी त्याला ३ जानेवारीपर्यंत पोलिस कोठडी सुनावली आहे.
तपासात असेही समोर आले आहे की, जुबेर पुण्यातील एका आयटी कंपनीत कार्यरत होता. मात्र, प्रत्यक्षात तो कट्टरपंथी विचारसरणीचा सक्रिय प्रचारक असल्याचा आरोप आहे. तो ठाणे जिल्ह्यातील पडघा गावात वारंवार जात असे. तेथे तरुणांचे मानसिक रूपाने कट्टरपंथीकरण करून ‘खिलाफत’, जिहाद आणि हिंसाचाराची विचारधारा पसरवत होता.
डिसेंबर २०२३ मध्ये एटीएसने पडघा येथे पहाटे छापा टाकला होता. मात्र, कारवाईची चाहूल लागताच जुबेर फरार झाला होता. जवळपास दोन वर्षांनंतर त्याची अटक झाल्यानंतर या दहशतवादी नेटवर्कचे धागेदोरे हळूहळू उलगडू लागले आहेत.
एटीएसच्या म्हणण्यानुसार, जुबेरकडून मिळालेले डिजिटल आणि गुप्तचर पुरावे त्याला थेट आंतरराष्ट्रीय दहशतवादी गट तसेच महाराष्ट्रातील पडघा गावाशी जोडतात. पडघा परिसराला काही स्थानिक कट्टर घटकांकडून ‘ग्रेटर सीरिया’ अशी ओळख दिली जात असल्याचेही तपासात नमूद करण्यात आले आहे. याच भागातून प्रशिक्षण घेऊन बाहेर पडलेले काही लोक देशातील विविध स्फोटांच्या घटनांमध्ये सहभागी असल्याची माहिती तपास यंत्रणांकडे आहे.
जुबेरच्या संपर्कातील साथीदार आणि संशयित व्यक्तींबाबत अधिक तपास करण्यासाठी सरकारी वकील राजेश कावेडिया यांनी पोलिस कोठडीची मागणी केली असून या प्रकरणाचा पुढील तपास सुरू आहे.
