(खेड-रत्नागिरी / प्रतिनिधी)
खेड तालुक्यातील लोटे येथील अध्यात्मिक वारकरी गुरुकुलाचे प्रमुख भगवान कोकरे महाराज पुन्हा एकदा गंभीर आरोपांच्या भोवऱ्यात सापडले आहेत. दोन दिवसांपूर्वी अल्पवयीन मुलीच्या तक्रारीनंतर निर्माण झालेल्या खळबळीला थंडावाही लागलेला नसताना, आता आणखी एका अल्पवयीन मुलीने कोकरे महाराजांवर लैंगिक अत्याचाराचा नवा आरोप केला आहे.
या नव्या तक्रारीनंतर खेड पोलिसांनी कोकरे महाराज, त्यांचे सहकारी आध्यात्मिक शिक्षक प्रितेश कदम, तसेच पीडित मुलीची आत्या रोहिणी वामन या तिघांविरुद्ध गुन्हा दाखल केला आहे. ही धक्कादायक घटना १६ ऑक्टोबर २०२४ ते १८ जून २०२५ या कालावधीत लोटे येथील वारकरी गुरुकुलात घडल्याचे समोर आले आहे.
मिळालेल्या माहितीनुसार, पीडित मुलीने दिलेल्या जबाबात कोकरे महाराजांकडून धार्मिक शिक्षण आणि साधनेच्या नावाखाली तिच्यावर लैंगिक अत्याचार करण्यात आल्याचा उल्लेख आहे. या प्रकरणात प्रितेश कदम आणि रोहिणी वामन यांच्या सहभागाचाही आरोप तिने केला आहे. या आधारावर खेड पोलिसांनी संबंधित तिघांविरुद्ध बी.एन.एस. कलम 64(2)(1), 65, 351(3), 3(5) तसेच ‘पॉक्सो’ कायदा 2012 चे कलम 4 आणि 8 अंतर्गत गुन्हा नोंदवला आहे.
याआधीही एका अल्पवयीन मुलीच्या तक्रारीवरून कोकरे महाराज आणि प्रितेश कदम यांना न्यायालयात हजर करण्यात आले होते. त्यांना दोन दिवसांची पोलिस कोठडी सुनावण्यात आली होती. मात्र नव्या तक्रारीनंतर या प्रकरणाचे स्वरूप अधिक गंभीर झाले असून, आरोपींवर कठोर कारवाईची शक्यता वर्तवली जात आहे. दरम्यान, लोटे गुरुकुलात अनाथ, निराधार आणि आर्थिकदृष्ट्या दुर्बल कुटुंबांतील मुलींना मोफत शिक्षण व आध्यात्मिक संस्कार दिले जातात, असा दावा करण्यात येत होता. परंतु या आड लैंगिक शोषणाचे प्रकार सुरू असल्याचे उघड झाल्याने परिसरात संतापाची लाट उसळली आहे.
स्थानिक नागरिक आणि सामाजिक संघटनांकडून या संपूर्ण प्रकरणाची उच्चस्तरीय चौकशी करण्याची तसेच गृहमंत्र्यांनी स्वतः हस्तक्षेप करून सत्य परिस्थिती उघड करावी, अशी जोरदार मागणी होत आहे. लोटे गुरुकुल प्रकरण आता केवळ स्थानिक नव्हे, तर राज्यपातळीवर चर्चेचा विषय ठरत असून, या प्रकरणाच्या तपासावर सर्वांचे लक्ष केंद्रीत झाले आहे.
