(रत्नागिरी)
५८ व्या आंतर-महाविद्यालयीन सांस्कृतिक युवा महोत्सवाच्या अंतिम फेरीत गोगटे-जोगळेकर महाविद्यालयाच्या संघाने उत्कृष्ट कामगिरी केली आहे. महाविद्यालयाने सादर केलेल्या ‘गाठोडं’ या मराठी स्किटला रौप्य पदक प्राप्त झाले.
या स्पर्धेत मनस्वी वारीक, गायत्री मांगले, आस्था खेडकर, मैथिली सावंत, प्रार्थना भंडारे (बॅचलर ऑफ परफॉर्मिंग आर्ट्सच्या विद्यार्थिनी) तसेच मधुश्री वझे (संस्कृत विभाग) यांनी सहभाग घेतला. ‘गाठोडं’ या स्किटचे लेखन आणि दिग्दर्शन मयूर साळवी यांनी केले.
स्किटमध्ये महिलांच्या आयुष्यातील विविध टप्प्यांवर येणाऱ्या समस्या मंगळागौरच्या खेळांच्या माध्यमातून प्रभावीपणे उलगडण्यात आल्या. प्रत्येक महिलेला मार्गदर्शनासाठी एका आजीच्या ‘गाठोड्याची’ गरज असते, हा संदेश या सादरीकरणातून ताकदीने व्यक्त झाला.
या यशामागे प्रा. वेदांत सौंदलेकर आणि बॅचलर ऑफ परफॉर्मिंग आर्ट्स विभाग प्रमुख डॉ. आनंद आंबेकर यांचे मार्गदर्शन लाभले.
या यशस्वी कामगिरीबद्दल प्राचार्य डॉ. मकरंद साकळकर, प्रशासकीय उपप्राचार्य डॉ. सुरेंद्र ठाकूरदेसाई, कला शाखा उपप्राचार्य डॉ. कल्पना आठल्ये, वाणिज्य शाखा उपप्राचार्य डॉ. सीमा कदम, विज्ञान शाखा उपप्राचार्य डॉ. अपर्णा कुलकर्णी आणि सांस्कृतिक विभाग प्रमुख डॉ. आनंद आंबेकर यांनी विद्यार्थिनींचे अभिनंदन केले आहे.
