(रत्नागिरी / जमीर खलिफे)
खेळामुळे जीवनात अनेक संधी निर्माण होतात तसेच करिअरमध्येही खेळाचा मोठा उपयोग होतो. तंत्रशुद्ध प्रशिक्षण मिळावे यासाठी शिबिरांचे आयोजन केले जाते. कुस्तीच्या विकासासाठी पालकमंत्री उदय सामंत यांनी भरघोस निधी उपलब्ध करून दिला असून खेळाडूंना आंतरराष्ट्रीय सुविधा देण्याचे महत्त्वपूर्ण कार्य त्यांनी केले आहे. त्याबद्दल जिल्हा क्रीडा खात्याच्यावतीने त्यांचे विशेष आभार मानले जातात, असे गौरवोद्गार जिल्हा क्रीडाधिकारी विजय शिंदे यांनी कुस्ती प्रशिक्षण शिबिराच्या उद्घाटनावेळी काढले.
जिल्हा क्रीडा अधिकारी कार्यालय आणि रत्नागिरी जिल्हा कुस्ती असोसिएशन यांच्या संयुक्त विद्यमाने आयोजित जिल्हास्तरीय कुस्ती प्रशिक्षण शिबिराचा आज छत्रपती शिवाजी महाराज स्टेडियमवर उत्साहात शुभारंभ झाला. हे शिबिर १ ऑगस्ट ते १० ऑगस्ट या कालावधीत दररोज सकाळी १० ते सायंकाळी ५ वाजेपर्यंत होणार आहे.
या शिबिरात रत्नागिरी शहर व परिसरातील सुमारे १० शाळांमधील विद्यार्थी सहभागी झाले आहेत. विद्यार्थ्यांना कुस्तीचे बारकावे आत्मसात करता यावेत आणि भविष्यात उत्तम पैलवान घडावेत, या उद्देशाने हे शिबिर आयोजित करण्यात आले आहे.
शिबिराचे उद्घाटन जिल्हा क्रीडा अधिकारी विजय शिंदे यांच्या हस्ते करण्यात आले. यावेळी क्रीडाधिकारी सुनील कोळी, रत्नागिरी जिल्हा कुस्ती असोसिएशनचे अध्यक्ष भाई विलणकर, कार्यवाह सदानंद जोशी, कार्याध्यक्ष डॉ. चंद्रशेखर केळकर, उपाध्यक्ष अमित विलणकर, आनंद तापेकर, योगेश हरचेकर, सैफुद्दीन पठान, नवनाथ जाधव, प्रशिक्षक झाकीर सय्यद तसेच विद्यार्थी मोठ्या संख्येने उपस्थित होते.
