(संगमेश्वर / एजाज पटेल)
संगमेश्वर तालुक्यातील मासरंग या ठिकाणी वन्य प्राण्यांची शिकार करण्याच्या हेतूने फिरणाऱ्या आठ जणांना सिंगल बॅलर बंदूक, जिवंत काडतूस व इतर मुद्देमाल व चारचाकी वाहन सहित संगमेश्वर पोलिसांनी ताब्यात घेण्याची धडाकेबाज कामगिरी केली असून ही कामगिरी मासरंग – शेनवडे रस्त्यावर 12 एप्रिल रोजी 2 वाजता करण्यात आली. वन्य प्राण्यांची शिकार करणारेच पोलिसांच्या सापळ्यात सापडल्याने तालुक्यात चांगलीच खळबळ उडाली आहे.
संगमेश्वर पोलीस ठाण्याचे पोलीस उप निरीक्षक प्रशांत शिंदे, पोलीस हेड कॉन्स्टेबल सचिन कामेरकर,पोलीस हेडकॉन्स्टेबल सिद्देश आंब्रे, पोलीस कॉन्स्टेबल सोमनाथ अव्हाड, होमगार्ड मोहिते हे पोलीस वाहनाने रात्रीच्या वेळी गस्त घालत असताना तालुक्यातील मासरंग – शेनवडे रस्त्यावर महिंद्रा पिकअप बोलेरो (गाडी क्रमांक MHO8/E/0950 ) या चारचाकी वाहनातून आठजण शिकारीच्या उद्देशाने फिरताना आढळून आले.
याप्रकरणी दशरथ दिलिप बारगोडे वय 39 राहणार पोमेंडी बुद्रुक, कारवांचीवाडी, जि. रत्नागिरी, विजय भिकाजीं पाछकुडे वय 42 राहणार शेनवडे ता. संगमेश्वर, सुभाष दाजी बोबळे वय 50 राहणार शेनवडे, चिलेवाडी ता. संगमेश्वर, गणेश गंगाराम लाखन वय 32 राहणार शेनवडे, खालचीवाडी ता. संगमेश्वर, सत्यवान सिताराम जोगळे वय 38 राहणार शेनवडे ता. संगमेश्वर, रमेश सिताराम लाखन वय 43 वय राहणार शेनवडे खालचीवाडी ता. संगमेश्वर, सुरेश मोळू जोगळे वय 38 राहणार शेनवडे जोगळेवाडी ता. संगमेश्वर, दिलिप रामचंद्र बारगोडे पोमेंडी बुद्रुक कारवांचीवाडी या आठ जणांना ताब्यात घेण्यात आले आहे.
वन्य प्राण्यांची शिकार करण्याच्या उद्देशाने दिलिप रामचंद्र बारगोडे यांच्या नावे शेती सरक्षण परवाना असलेली सिंगल बॅलर बंदूक काडतूस बंदूक, शक्तिमान 12 एक्सप्रेसने दीडशे रुपये किमतीचा एक काडतूस, शक्तिमान 12 एक्सप्रेस 4.8 तीन निळ्या रंगाचे, सहाशे रुपये किमतीचे चार काडतूस आणि विजेच्या सहा बॅटऱ्या स्वतःजवळ बाळगून वावरताना आढळून आले. याप्रकरणी संगमेश्वर पोलिसांनी वापरण्यात आलेली पिकअप बोलेरो, बंदूक असा एकूण 2,57,250 रुपयांच्या मुद्देमालासहित या आठजणांना ताब्यात घेतले आहे.
काल रात्री 2 वाजताच्या दरम्याने मासरंग-शेनवडे या ठिकाणी शिकारी करणाऱ्यांना संगमेश्वर पोलिसांनी सापळ्यात अडकवून त्यांच्यावर संगमेश्वर पोलीस ठाण्यात गुन्हा रजि. 65/2025, शस्त्र अधिनियम 1959 चे कलम, 3/25, 30 भारतीय न्याय संहिता कलम 3(5) प्रमाणे गुन्हा दाखल केला असून अधिक तपास संगमेश्वर पोलीस ठाण्याचे पोलीस उपअधिक्षक शिवप्रसाद पारवे यांच्या मार्गदर्शनाखाली पोलीस उप निरीक्षक चंद्रकांत कांबळे करत आहेत.
