(रत्नागिरी / प्रतिनिधी)
तालुक्यातील कोतवडे येथे दुर्दैवी अपघातात एका वृद्ध महिला पादचारी जखमी झाल्या. प्राथमिक आरोग्य केंद्रात उपचारासाठी जाणाऱ्या महिलेला अज्ञात वाहनाने जोरदार धडक दिली. धडक दिल्यानंतर वाहनचालक पसार झाला. जखमी महिलेला जिल्हा शासकीय रुग्णालयात दाखल करण्यात आले असून ग्रामीण पोलिस ठाण्यात अज्ञात चालकाविरुद्ध गुन्हा नोंदविण्यात आला आहे.
जखमी महिलेचे नाव शारदा सखाराम लोखंडे (वय ७२, रा. सड्ये, रत्नागिरी) असे आहे. हा प्रकार शुक्रवारी (ता. ३) सकाळी सव्वा अकराच्या सुमारास कोतवडे प्राथमिक आरोग्य केंद्राच्या रस्त्यावर घडला. मिळालेल्या माहितीनुसार, शारदा लोखंडे या उपचारासाठी पायी जात असताना भरधाव वेगाने आलेल्या अज्ञात वाहनाने त्यांना धडक दिली. या धडकेत त्या जखमी झाल्या असून, त्यांना तातडीने जिल्हा शासकीय रुग्णालयात हलविण्यात आले. अपघातानंतर चालक घटनास्थळावरून फरार झाला. या प्रकरणी ग्रामीण पोलिस ठाण्यात गुन्हा दाखल करून अज्ञात वाहनचालकाचा शोध सुरू आहे.
