(पुणे)
देहू येथील संत तुकराम महाराजांचे अकरावे वंशज ह.भ.प शिरीष महाराज मोरे यांनी आत्महत्या केली आहे. देहूतील राहत्या घरी त्यांनी आज सकाळी साडेआठच्या सुमारास उपरण्याने गळफास घेऊन आत्महत्या केली आहे. आर्थिक विवंचनेतून ही आत्महत्या झाल्याचा अंदाज पोलिसांनी व्यक्त केला आहे. येत्या 20 फेब्रुवारीला त्यांचे लग्न होणार होते.
देहूमध्ये ह.भ.प शिरीष महाराज मोरे यांनी नवीन घर देखील बांधले होते. खालच्या मजल्यावर त्यांचे आई-वडील तर वरच्या मजल्यावर ते राहत होते. मंगळवारी (दि.04) रात्री शिरीष मोरे हे नेहमीप्रमाणे त्यांच्या खोलीमध्ये झोपण्यासाठी गेले होते. मात्र सकाळी साडे आठ वाजल्यानंतरही ते खाली आले नव्हते. त्यामुळे घरातील सदस्य वरती गेले. दरवाजा वाजल्यानंतर पण दार उघडले जात नव्हते. आतमधून कोणताही प्रतिसाद मिळत नसल्यामुळे दार तोडण्यात आले. यावेळी ह.भ.प मोरे यांनी पंख्याच्या हुकाला उपरण्याने गळफास घेऊन आत्महत्या केल्याचे निदर्शनास आले. आत्महत्या करण्यापूर्वी त्यांनी चिठ्ठी लिहून ठेवली आहे.
पोलिसांनी दिलेल्या माहितीनुसार, प्राथमिक दृष्ट्या आत्महत्येचे कारण हे आर्थिक विवंचेना असल्याचे दिसून येत आहे. याबाबत त्यांनी चिठ्ठीमध्ये उल्लेख देखील केला आहे. त्यांनी आत्महत्येपूर्वी लिहिलेल्या चिठ्ठीतून पुढील तपास केला जाणार असल्याचे पोलिसांनी सांगितले. देहूरोड पोलीस अधिक तपास करत आहेत. दरम्यान, हभप शिरीष मोरे महाराज यांच्या पार्थिवावर दुपारी चार वाजता वैकुंठ स्मशान भूमी येथे अंत्यसंस्कार करण्यात येणार आहेत.
शिरीष महाराज हे संत तुकाराम महाराजांचे अकरावे वंशज होते. तसेच त्यांचे निगडी येथे इडली उपहारगृह देखील होते. त्यांच्या पश्चात आई आणि वडील असा परिवार आहे. नुकताच त्यांचा साखरपुडा झाला होता. 20 फेब्रुवारीला रोजी मोरे यांचा विवाह होणार होता. आत्महत्येच्या घटनेमुळे देहूगावावर शोककळा पसरली आहे. सर्व क्षेत्रातील व्यक्तींनी हळहळ व्यक्त केली आहे.
