(रत्नागिरी)
रत्नागिरी एमआयडीसी परिसरात प्रतिबंधित असलेल्या व्हेल माशाची उलटी (Ambergris) बेकायदेशीररीत्या विक्रीसाठी बाळगणाऱ्या तीन जणांना स्थानिक गुन्हे अन्वेषण शाखेच्या पथकाने अटक केली आहे. जप्त केलेल्या व्हेल उलटीची किंमत आंतरराष्ट्रीय बाजारात तब्बल ३ कोटी रुपये असून, पोलिसांनी एकूण ३ कोटी १० लाख ३० हजार रुपयांचा मुद्देमाल जप्त केला आहे.
ही कारवाई ३० ऑक्टोबर रोजी रात्री साडेनऊच्या सुमारास एमआयडीसी रत्नागिरी परिसरातील टीआरपी ते एमआयडीसी रोडवरील बाफना मोटर्सच्या पुढील भागात करण्यात आली. स्थानिक गुन्हे अन्वेषण शाखेचे कर्मचारी गणेश राजेंद्र सावंत यांनी दिलेल्या फिर्यादीनुसार, आरोपी कोणतीही परवानगी न घेता व्हेल माशाची उलटी विक्रीसाठी ताब्यात ठेवून होते.
पोलिसांनी आरोपींकडून ३ किलो ४ ग्रॅम वजनाची, पांढरी-काळपट रंगाची व्हेल माशाची उलटी, प्लास्टिक पिशवीसह जप्त केली. याशिवाय दोन मोटारसायकली आणि सुझुकी कंपनीची स्विफ्ट कार ताब्यात घेण्यात आली.
अटक करण्यात आलेले आरोपी पुढीलप्रमाणे आहेत — आसिफ अस्लम मोरस्कर (३८, रा. पिंपळी बुद्रुक, नुराणी मोहल्ला, ता. चिपळूण), रोहीत रमेश चव्हाण (३१, रा. आंबेशेत, कुरटेवाडी, ता. रत्नागिरी), तेजस पर्शुराम कांबळे (३२, मुळ रा. आडरे, मधलीवाडी, चिपळूण; सध्या रा. अमनतारा अपार्टमेंट, रत्नागिरी)
तिन्ही आरोपींविरुद्ध वन्यजीव संरक्षण कायदा आणि इतर संबंधित कलमांखाली गुन्हा दाखल करण्यात आला असून, पुढील तपास स्थानिक गुन्हे अन्वेषण शाखेकडून सुरू आहे
