(लांजा/प्रतिनिधी)
लांजा शहरातील शहनाई हॉल समोर काल सोमवारी 18 एप्रिल रोजी दोन दुचाकींचा सायंकाळी 5.30 वा. च्या सुमारास अपघात झाला. समोरासमोर झालेल्या या धडकेत दोघेजण गंभीर जखमी झाले असून एकाच्या डोळ्याला गंभीर दुखापत झाली आहे. हर्षल कुलकर्णी (22, खानू, रत्नागिरी), सुबानी इस्माईल झारी (32, लांजा) अशी जखमींची नावे आहेत.
सविस्तर माहिती अशी की, अभिषेक वासकर (19, रोहिदासवाडी लांजा) हा आपल्या आपल्या ताब्यातील डयुएट दुचाकीवरुन सुबानी झारी (32) यांना घेवून लांजाच्या दिशेने जात होता. याचवेळी हर्षल कुलकर्णी (22) हा आपल्या ताब्यातील दुचाकीने लांजावरून खानूकडे चालला होता. लांजा शहरातील कुंभारवाडीजवळच्या शहनाई हॉलसमोर या दोन दुचाकींची समोरासमोर धडक झाली. या धडकेत हर्षल कुलकर्णी, सुबानी झारी यांना गंभीर दुखापत झाली. दोघांना लांजा ग्रामीण रुग्णालयात उपचारासाठी दाखल करण्यात आले. त्यानंतर अधिक उपचारासाठी रत्नागिरी जिल्हा शासकीय रुग्णालयात दाखल करण्यात आले. या घटनेचा अधिक तपास लांजा पोलीस करत आहेत.
