(मुंबई)
होळी सण तीन आठवड्यांवर येऊन ठेपला आहे. चाकरमानी अनेकजण या सणाला गावी जातात. त्यामुळे महिनाभर आधीपासूनच चाकरमान्यांची रेल्वे गाड्यांसह एसटी बसच्या तिकीट बुकिंगसाठी रांगा लावतात. यामध्ये कोकणात जाणाऱ्या प्रवाशांची संख्या मोठ्या प्रमाणात असते. त्यामुळे दरवर्षी रेल्वे प्रशासनाकडून होळीनिमित्त कोकणवासियांसाठी विशेष रेल्वे गाड्या सोडण्यात येतात. तसेच यंदाही मध्य रेल्वे आणि कोकण रेल्वेने चाकरमान्यांसाठी रेल्वेगाड्या चालविण्याचे आयोजन केले आहे. कोकण रेल्वे प्रशासनानं मध्य रेल्वेच्या समन्वयानं मुंबई ते मडगाव मार्गावर विशेष गाड्या चालवण्याची घोषणा केली आहे. यामुळं प्रवाशांना त्यांच्या गावी जाण्यासाठी अधिक सुविधा उपलब्ध होणार आहे.
विशेष गाड्यांचं तपशीलवार वेळापत्रक आणि आरक्षणाबाबतची माहिती कोकण रेल्वे प्रशासनानं अधिकृतपणे जाहीर केली आहे. प्रवाशांना प्रवासात कोणत्याही अडचणींचा सामना करावा लागू नये यासाठी या विशेष गाड्यांचे नियोजन करण्यात आलं आहे.
गाडी क्रमांक ०११५१ सीएसएमटी – मडगाव विशेष रेल्वेगाडी सीएसएमटीवरून ६ मार्च, १३ मार्च रोजी मध्यरात्री १२ वाजून २० मिनिटांच्या सुमारास सोडण्यात येणार आहे. ही रेल्वेगाडी अनुक्रमे ७, १४ मार्च रोजी दुपारी १ वाजून ३० मिनिटांनी मडगाव येथे पोहोचेल.
गाडी क्रमांक ०११५२ मडगाव – सीएसएमटी विशेष रेल्वेगाडी मडगाव येथून ६ मार्च, १३ मार्च रोजी दुपारी २ वाजून १५ मिनिटांच्या सुमारास सोडण्यात येणार असून ही रेल्वेगाडी त्याच दिवशी मध्यरात्री ३ वाजून ४५ मिनिटांनी सीएसएमटीला पोहोचेल. थांबा : या रेल्वेगाडीला दादर, ठाणे, पनवेल, पेण, रोहा, माणगाव, खेड, चिपळूण, संगमेश्वर रोड, रत्नागिरी, आडवली, विलावडे, राजापूर रोड, वैभववाडी रोड, कणकवली, सिंधुदुर्ग, कुडाळ, सावंतवाडी रोड आणि थिवीम या रेल्वे स्थानकांवर थांबा असेल.
दरम्यान, या रेल्वेगाडीला एकूण २४ डबे असतील. प्रथम श्रेणीचा एक डबा, प्रथम आणि द्वितीय श्रेणीचा एकत्र एक डबा, द्वितीय श्रेणीचे दोन डबे, तृतीय श्रेणीचे १० डबे, शयनयान चार डबे, जनरल चार डबे, एसएलआरचे दोन डबे असतील.
कोच (एकूण २४ कोच) (Coach Positions)
- फर्स्ट एसी: ०१ कोच
- कंपोझिट (फर्स्ट एसी + टू टायर एसी): ०१ कोच
- टू टायर एसी: ०२ कोच
- थ्री टायर एसी: १० कोच
- स्लीपर: ०४ कोच
- जनरल: ०४ कोच
- एसएलआर: ०२ कोच
गाडी क्रमांक ०११२९ लोकमान्य टिळक टर्मिनस – मडगाव १३ मार्च, २० मार्च रोजी लोकमान्य टिळक टर्मिनस येथून रात्री १० वाजून १५ मिनिटांच्या सुमारास सुटेल. ही रेल्वेगाडी अनुक्रमे १४ मार्च आणि २१ मार्च रोजी दुपारी १२ वाजून ४५ मिनिटांनी मडगाव येथे पोहोचेल.
गाडी क्रमांक ०११३० मडगाव – लोकमान्य टिळक टर्मिनस विशेष रेल्वेगाडी १४ मार्च, २१ मार्च रोजी मडगाव येथून दुपारी १ वाजून ४० मिनिटांच्या सुमारास सुटेल. ही रेल्वेगाडी २२ मार्च रोजी पहाटे ४ वाजून ५ मिनिटांनी वाजता लोकमान्य टिळक टर्मिनस येथे पोहोचेल.
थांबा : या रेल्वेगाडीला ठाणे, पनवेल, पेण, रोहा, माणगाव, वीर, खेड, चिपळूण, संगमेश्वर रोड, रत्नागिरी, आडवली, विलावडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ, सावंतवाडी रोड, थिवीम आणि करमळी स्थानकांवर थांबा असेल.
या रेल्वेगाडीला एकूण २० डबे असतील. प्रथम श्रेणीचा एक डबा, द्वितीय श्रेणीचे दोन डबे, तृतीय श्रेणीचे सहा डबे, शयनयानचे आठ डबे, पॅन्ट्री कारचा एक डबा, जनरेटर कारचे दोन डबे असतील.
गाडीची रचना (एकूण २० एलएचबी कोच)
- फर्स्ट एसी: ०१ कोच
- टू टायर एसी: ०२ कोच
- थ्री टायर एसी: ०६ कोच
- स्लीपर: ०८ कोच
- पॅन्ट्री कार: ०१ कोच
- जनरेटर कार: ०२ कोच
आरक्षण : या रेल्वेगाड्यांचे तिकीट आरक्षण २४ फेब्रुवारी रोजी सर्व संगणकीकृत आरक्षण केंद्रांवर आणि आयआरसीटीसी या संकेतस्थळावर सुरू होईल, अशी माहिती कोकण रेल्वेद्वारे दिली. रेल्वे क्रमांक ०११५२ आणि ०११३० चे बुकिंग २४ फेब्रुवारीपासून सर्व पॅसेंजर रिझर्व्हेशन सिस्टम (PRS), इंटरनेट आणि IRCTC वेबसाइटवर सुरू होईल. प्रवाशांंनी गाड्यांची अधिक माहिती www.enquiry.indianrail.gov.in वर किंवा एनटीईएस अॅपवर मिळे्ल.
