(मनोरंजन)
प्राजक्ता माळीच्या ‘फुलवंती’ चित्रपटाची सध्या जोरदार चर्चा सुरू आहे. प्राजक्ता माळीचा गुरुवारी वाढदिवस होता. तिच्या वाढदिवशी तीने आपल्या नव्या चित्रपटाबाबत मोठी घोषणा केली आहे. प्राजक्ताचा काल 35 वा वाढदिवस होता. ‘फुलवंती’ चित्रपटाची निर्मिती स्वत: प्राजक्ताने केली असून या चित्रपटामध्ये ती प्रमुख भूमिकेतही दिसणार आहे.
अभिनेत्रीने आपल्या वाढदिवशी चाहत्यांना खास गिफ्ट दिलं आहे. निर्माती प्राजक्ता माळीने आपल्या वाढदिवसाच्या निमित्ताने एक लक्षवेधी मोशन पोस्टर शेअर करत चित्रपटाच्या प्रदर्शनाची घोषणा केली आहे. येत्या 11 ऑक्टोबर रोजी ‘फुलवंती’ प्रेक्षकांच्या भेटीला येणार आहे. या चित्रपटाचं दिग्दर्शन स्नेहल प्रवीण तरडे करणार आहे. स्नेहल तरडे मराठी इंडस्ट्रीतील प्रसिद्ध अभिनेत्री असून ‘फुलवंती’ चित्रपटाच्या माध्यमातून ती दिग्दर्शन क्षेत्रात पदार्पण करणार आहे.
शेअर केलेल्या मोशन पोस्टरमध्ये, एका सजलेल्या राजेशाही पालखीत भरजरी वस्त्रे आणि दागिने परिधान केलेली ‘फुलवंती’ दिमाखत बसलेली दिसत आहे. “पद्मविभूषण स्वर्गीय बाबासाहेब पुरंदरे” यांच्या ‘फुलवंती’ कादंबरीवर आधारित हा चित्रपट आहे. चित्रपटाबद्दल निर्मात्या प्राजक्ता माळीने सांगितले की, “गेल्या अनेक दिवसांपासून मी या क्षणाची आतुरतेने वाट पाहत होते. अखेर आज तो दिवस उजाडला आहे. मी माझ्या वाढदिवशी माझ्या चाहत्यांना आनंदाची बातमी देऊ शकले, याबद्दल मी देवाचे आभार मानते. ‘फुलवंती’ चित्रपट माझ्यासाठी खूप खास आहे.
‘फुलवंती’.. शिवशाहीर बाबासाहेब पुरंदरे यांच्या सिद्धहस्त लेखणीतून साकारलेली अलौकिक कलाकृती आता रुपेरी पडद्यावर येणार आहे. पॅनोरमा स्टुडिओज आणि अभिनेत्री प्राजक्ता माळी यांची संयुक्त निर्मिती असलेला ‘फुलवंती’ चित्रपट पॅनोरमा स्टुडिओजची आजवरची सर्वात मोठी मराठी चित्रपट निर्मिती ठरणार आहे. अभिनेत्री प्राजक्ता माळी यानिमित्ताने चित्रपट निर्मिती क्षेत्रात पदार्पण करीत आहे.
