(संगमेश्वर)
कोकण रेल्वे प्रशासनाने कर्नाटक राज्यातील कुमठा रेल्वे स्थानकात हिस्सार कोईम्बतूर या एक्स्प्रेसला थांबा दिला आहे. कोकण रेल्वेचे हे दुजेपणाचे धोरण संगमेश्वर तालुक्यातील जनतेच्या वाट्याला आले आहे. याबाबत निसर्गरम्य चिपळूण संगमेश्वर फेसबुक ग्रुपचे प्रमुख संदेश जिमन आणि अन्य सहकाऱ्यांनी प्रचंड चीड व्यक्त केली आहे.
आम्ही गेली दीड संगमेश्वर रोड रेल्वे स्थानकात तीन एक्स्प्रेसना थांबा मिळावा म्हणून मागणी करत आहोत. कोकण रेल्वे प्रशासन थातूरमातूर कारण दाखवून दिरंगाई करीत आहे. वेळोवेळी पत्रव्यवहार करूनही थांबे मिळत नसतील तर ही कोकण रेल्वे नावाला फक्त कोकण रेल्वे आहे काय? असा संतप्त सवाल त्यांनी केला आहे. कोकण रेल्वेच्या उभारणीत ज्या राज्यांचा आर्थिक सहयोग कमी त्याच राज्यांना कोकण रेल्वे झुकते माप देत आहे, असा आरोपही पत्रकार संदेश जिमन यांनी केला आहे.
अलिकडे छत्रपती संभाजी महाराज यांच्या शौर्य गाथेवर आधारित “छावा” हिंदी चित्रपट प्रदर्शित झाला. देशातील तमाम चित्रपट प्रेक्षकांना संगमेश्वरमधील त्या ऐतिहासिक घटनेची जाण झाली आहे. पर्यटकांच्या पसंतीस संगमेश्वर तालुक्यातील अनेक ऐतिहासिक स्थळे उतरत आहेत. अशातच रेल्वेकडून सुरू असलेल्या या दिरंगाईमुळे सर्व स्तरातून नाराजी व्यक्त केली जात आहे.
गेल्या दीड वर्षापासून सुरू असलेल्या या लढ्यात अनेक निवेदने झाली, प्रजासत्ताकदिनी उपोषण झाले. कोकण रेल्वेच्या बेलापूर कार्यालयात अनेक बैठका झाल्या. पण उत्तर एकच मिळते.. रेल्वे बोर्डाकडे प्रस्ताव पाठविला आहे ! आमच्या मागण्या रास्त आहेत. प्रस्ताव जर का सकारात्मक असतील तर थांबे मिळण्यास विलंब का ? असा प्रश्न आता तालुकावासियांना पडला आहे.
