( गणपतीपुळे / वैभव पवार )
रत्नागिरी तालुक्यातील प्रसिद्ध तीर्थक्षेत्र असलेल्या गणपतीपुळे येथील स्वयंभू “श्रीं” च्या मंदिरात प्रतिवर्षाप्रमाणे संस्थान श्री देव गणपतीपुळे च्या वतीने माघी गणेशोत्सवाला मोठ्या उत्साहात व भक्तिभावात सुरुवात झाली आहे. या उत्त्सवाला श्रींच्या पंचसूक्त महापूजेने मुख्य पुजारी प्रभाकर मोरेश्वर घनवटकर आणि उपस्थित ब्रम्हवृंदांच्या मंत्रघोषाद्वारे शुभारंभ महापूजा संस्थान श्री देव गणपतीपुळे चे विश्वस्त निलेश कोल्हटकर यांचे शुभहस्ते सपत्नीक पार पडली. या शुभारंभ प्रसंगी संस्थान श्री देव गणपतीपुळे चे सरपंच डॉ. श्रीराम केळकर व सर्व पंच मंडळी, पुजारी व देवस्थानचे कर्मचारी, ग्रामस्थ व भाविक मोठ्या संख्येने उपस्थित होते.
या माघी गणेशोत्सवानिमित्त स्वयंभू श्रींच्या मंदिर व मंदिर परिसरात संस्थान श्री देव गणपतीपुळेच्या वतीने विविध कार्यक्रमांचे आयोजन करण्यात आले आहे. त्यामध्ये पहिल्या दिवशी माघी गणेशोत्सवाची सुरुवात श्रींच्या महापूजेने करण्यात आले. त्यानंतर दररोज सामुदायिक आरती, कीर्तन व अन्य कार्यक्रम संपन्न होणार आहेत. तसेच रात्रीच्या सत्रात करमणुकीचे प्रबोधनात्मक कार्यक्रम आयोजित करण्यात आले आहेत .या सर्व कार्यक्रमांचा स्थानिक ग्रामस्थ व भाविकांनी लाभ घ्यावा, असे आवाहन संस्थान श्री देव गणपतीपुळे यांचेवतीने करण्यात आले आहे.
