(राजापूर)
तालुक्यातील वडदहसोळ येथील ग्रामस्थ गिरीष म्हादये यांच्या घराच्या अंगणामध्ये गेले दोन दिवस रात्रीच्यावेळी बिबट्याचा वावर झाल्याचे त्यांच्या घर परिसरामध्ये लावण्यात आलेल्या सीसीटीव्ही कॅमेर्‍यामध्ये दिसून आले आहे. यामुळे स्थानिक ग्रामस्थांमध्ये भीतीचे वातावरण निर्माण झाले आहे. गावात संध्याकाळनंतर बाहेर पडायला लोक घाबरत आहेत.
गेल्या काही महिन्यांपासून तालुक्याच्या ग्रामीण भागासह शहरामध्येही बिबट्याच्या लोकवस्तीतील बिनधास्त वावराने लोकांमध्ये दहशत निर्माण केली आहे. अशातच आता वडदहसोळ भागामध्ये बिबट्याचा लोकवस्तीमध्ये बिबट्याचा वावर असल्याचे स्पष्ट झाले आहे. दोन वर्षापूर्वी शहरासह ग्रामीण भागामध्ये पाळीव जनावरांची शिकार करणार्‍या बिबट्याने वाहन चालकांवरही रात्रीच्यावेळी हल्ला करून जखमी केल्याच्या घटनाही घडल्या आहेत. तर गोवळ परिसरामध्ये सातत्याने गोठ्यामध्ये घुसून शेतकर्‍यांच्या पाळीव जनावरांना हल्ला करून बिबट्याने नुकसान केले होते.
लोकवस्तीतील बिबट्याच्या या बिनधास्त वावराने ग्रामस्थांमध्ये दहशत निर्माण केली आहे. तर, दिवसाढवळ्या शेतशिवारामध्ये तर, रात्रीच्यावेळी लोकवस्तीमध्ये बिनधास्त येवून पाळीव जनावरांना बिबट्याकडून हल्ला होवून नुकसान केले जात असल्याने शेतकरीही भयभीत झाले आहेत. मात्र, बिबट्याचा अद्यापही बंदोबस्त करण्यात वनविभागाला यश आलेले नाही. अशातच, तालुक्यातील वडदहसोळ भागामध्ये बिबट्याचा वावर वाढल्याचे दिसून येत आहे. सातत्याने रात्रीच्यावेळी लोकवस्तीमध्ये या बिबट्याचा वावर असल्याचे ग्रामस्थांमधून बोलले जात असताना
वडदहसोळ येथील ग्रामस्थ श्री. म्हादये यांनी आपल्या घराच्या आवारामध्ये लावलेल्या सीसीटीव्ही कॅमेर्‍यामध्ये बिबट्या झाल्याचे कैद झाले आहे. त्यामुळे या भागामध्ये बिबट्याचा वावर असल्यावर शिक्कामोर्तब झाले आहे. दरम्यान, या बिबट्याचा बंदोबस्त करण्याची मागणी गिरीष म्हादये यांच्यासह ग्रामस्थांकडून वनविभागाकडे करण्यात आली आहे.
