(रत्नागिरी)
रत्नागिरीतील शिवसेनेचे कट्टर कार्यकर्ते आणि माजी जिल्हा परिषद अध्यक्ष जयसिंग उर्फ आबा घोसाळे यांनी ठाकरे शिवसेनेला अखेरचा जय महाराष्ट्र केला. आपल्या कार्यकर्त्यांसह शनिवारी 5 ऑक्टोबर पालकमंत्री उदय सामंत यांच्या उपस्थितीत येथील शासकीय विश्रामगृहावर शिवसेनेत (शिंदे गट) प्रवेश केला.
गेल्या अनेक दिवसांपासून रत्नागिरीतील उबाठातील एक मातब्बर नेता शिंदे शिवसेनेत प्रवेश करणार असल्यी जोरदार चर्चा सुरू होती. गणेशोत्सवात जयसिंग उर्फ आबा घोसाळे यांच्या घरी पालकमंत्री उदय सामंत यांनी गणरायाया दर्शनासाठी भेट देखील दिली होती. त्यावेळी घरी दर्शनासाठी आलेल्या मंत्री सामंत यांचे घोसाळे कुटुंबियांनी स्वागत केले होते. त्यामुळे काहीतरी वेगळ घडणार अशी चर्चा राजकीय वर्तुळात होती. अखेर शनिवारी पालकमंत्री उदय सामंत यांच्या उपस्थितीत आबा घोसाळे यांनी अखेर शिंदे शिवसेनेत प्रवेश केला.
पक्षप्रवेशानंतर पालकमंत्री उदय सामंत यांनी सांगितले की, आबा घोसाळे हे कट्टर शिवसैनिक आहेत. शिवसेनेची पहिली ग्रामपंचायत त्यांनी रत्नागिरीत निवडून आणली. ते जिल्हा परिषद अध्यक्ष म्हणून त्यांनी काम केले होते. तर पक्ष प्रवेशाविषयी आबा घोसाळे यांनी प्रतिक्रिया देताना सांगितले की, राज्याचे उद्योग मंत्री तथा रत्नागिरी जिह्याचे पालकमंत्री उदय सामंत यांच्या खांद्याला खांदा लावून आम्ही काम करणार आहोत. येत्या विधानसभेला तालुक्यात त्यांना प्रचंड मताने निवडून आणणार आहोत, असा विश्वास त्यांनी व्यक्त केला. घोसाळे यांच्या पक्षप्रवेशाने जि.प.गटातील उबाठा च्या बालेकिल्ल्याला मोठे खिंडार पडणार आहे.
जयसिंग (आबा) घोसाळे यांनी शनिवारी पालकमंत्री उदय सामंत यांच्या उपस्थितीत शिवसेना पक्षात प्रवेश करतेवेळी त्यांच्या समवेत त्यांचे भाऊ अनिल घोसाळे, अमोल घोसाळे, विक्रांत घोसाळे, अमित घोसाळे, अक्षय भाटकर, अतुल घोसाळे, गजेंद्र नाईक, उदय नागवेकर, विश्वजित चौगुले, सचिन वायंगणकर, महेश डोंगरे, बाळकृष्ण घोसाळे, संदेश भाटकर, आकाश भाटकर, मंथन भाटकर, आरोही घोसाळे, मंदार घोसाळे, यांनी देखील शिवसेना पक्षात प्रवेश केला. या पक्ष प्रवेशाच्या कार्यक्रमावेळी तालुका प्रमुख बाबू म्हाप, माजी जिल्हा परिषद सदस्य प्रकाश रसाळ, रत्नागिरी नगर परिषदेचे माजी नगरसेवक बंटी किर आदी पदाधिकारी उपस्थित होते.
