(देवरुख / प्रतिनिधी )
देवरुख शिक्षण प्रसारक मंडळाच्या आठल्ये-सप्रे-पित्रे कनिष्ठ महाविद्यालयाचा वार्षिक पारितोषिक वितरण समारंभ ज्येष्ठ विधीज्ञ ॲड. विलास पाटणे यांच्या प्रमुख उपस्थितीत उल्हासपूर्ण वातावरणात संपन्न झाला..
कार्यक्रमाचे प्रास्ताविक प्राचार्य डॉ. तेंडोलकर यांनी करताना बदलते शैक्षणिक प्रवाह आणि वैयक्तिक कौशल्याचे महत्त्व, विविध कंपन्यांकडून कर्मचारी नियुक्तीमध्ये असणाऱ्या अपेक्षा याबाबत सविस्तर विवेचन केले. प्रा. सानिका भालेकर यांनी शैक्षणिक वर्ष: २०२४-२५ मधील शैक्षणिक तसेच सहशैक्षणिक कार्यक्रम-उपक्रमांच्या अहवालाचे वाचन केले. यानंतर पारितोषिक प्राप्त विद्यार्थ्यांच्या यादीचे वाचन प्रा. सानिका भालेकर आणि प्रा. संदीप मुळ्ये यांनी केले.
या कार्यक्रमात विद्यार्थ्यांना कला, क्रीडा, सांस्कृतिक स्पर्धांमधील यशासाठी महाविद्यालयाच्यावतीने मान्यवरांच्या हस्ते गौरविण्यात आले. या कार्यक्रमात देवरुख शिक्षण प्रसारक मंडळाच्यावतीने विद्यार्थ्यांच्या विशेष यशासाठी त्यांना रोख रक्कम देऊन सन्मानित करण्यात आले. महाविद्यालयाच्यावतीने माजी विद्यार्थिनी सृष्टी संदीप वेल्हाळ हिला चार्टर्ड अकाउंटंट परीक्षा उत्तीर्ण झाल्याबद्दल, तर विद्यार्थी विक्रम घाग व आयुष आगरे यांना त्यांच्या राष्ट्रीय क्रिकेट स्पर्धेतील यशासाठी सन्मानित करून शुभेच्छा देण्यात आल्या.
प्रमुख अतिथी ॲड. विलास पाटणे यांनी विद्यार्थ्यांना मार्गदर्शन करताना आजच्या युगात गुणपत्रकापेक्षा कौशल्य महत्त्वाचे असल्याचे अनेक उदाहरणास नमूद केले. प्रत्येक विद्यार्थ्याने आपली कुवत ओळखून आपल्या भविष्यातील करिअरसाठी आवडीचे क्षेत्र निवडण्याविषयी आग्रही मत व्यक्त केले. अनेक व्यक्तिमत्त्वांची उदाहरणे देऊन त्यांच्या कार्याविषयी सविस्तर माहिती कथन केली. जगातील सर्वात आनंदी, सुखी व शांत असणाऱ्या फिनलँड देशातील शैक्षणिक पद्धत व मूलभूत शैक्षणिक सुविधा याबाबत सविस्तर आढावा घेतला. जगात ए. आय. क्रांतीमुळे झालेले बदल, त्याचा कशाप्रकारे स्वीकार करून लाभ घेतला पाहिजे असे मत व्यक्त केले.
संस्थाध्यक्ष सदानंद भागवत यांनी आपल्या अध्यक्षीय समारोपात आधुनिक ए. आय. युग त्यातील जग आणि भारताला असणारी संधी याबाबत सविस्तर माहिती देऊन, कोणत्याही क्षेत्रात विविध बदल झाले तरी व्यापार आणि शेती यामध्ये कोणतेही बदल होत नसल्याचे सांगून त्याप्रमाणे प्रत्येकाने बदलण्याची आज खरी गरज असल्याचे प्रतिपादन याप्रसंगी केले. भारताचे स्थान जगामध्ये उंचीवर घेऊन जायचे असेल तर प्रत्येक नागरिकाची असणारी जबाबदारी व कर्तव्य याप्रसंगी त्यांनी विशद केली. कार्यक्रमाचे सूत्रसंचालन प्रा. मयुरेश राणे यांनी, तर आभार प्रदर्शन पर्यवेक्षक प्रा. एम. आर. लुंगसे यांनी केले. संपूर्ण कार्यक्रमाच्या यशस्वीसाठी कनिष्ठ महाविद्यालयातील शिक्षक व शिक्षकेतर कर्मचाऱ्यांनी मेहनत घेतली.
फोटो:- राष्ट्रीय खेळाडू आयुष आगरे आणि पालकांचा सत्कार करताना ॲड. पाटणे आणि उपस्थित मान्यवर.
