(रत्नागिरी)
तालुक्यातील गणपतीपुळे ते चाफे रस्त्यावर दोन मोटारीमध्ये अपघात झाला. या अपघातात चार जण जखमी झाले. जयगड पोलिस ठाण्यात संशयित चालकाविरुद्ध गुन्हा दाखल करण्यात आला आहे. साहील उल्हास मुळे (वय २८, रा. जाकादेवी, रत्नागिरी ) असे संशयित चालकाचे नाव आहे. ही घटना शुक्रवारी (ता. १७) सकाळी सव्वा अकराच्या सुमारास गणपतीपुळे ते चाफे रस्त्यावर घडली होती.
पोलिसांकडून मिळालेल्या माहितीनुसार मोटार (क्र. एमएच-०५ एफ बी ५६५७) वरील चालक गणपतीपुळे ते चाफे असे जात असताना समोरुन येणारी मोटार (क्र. एमएच-०८ एएन ६५२५) वरिल चालक संशयित साहील मुळे याने मोटार निष्काळजीपणे चालवून अपघात केला.
या अपघातात केतन रमेश भंडारी २५, भावना केतन भंडारी २४, कमलाकर शांताराम म्हात्रे ३०, सलोनी कमलाकर म्हात्रे २५ (सर्व रा. यरंदा ता. अंबरनाथ जि. ठाणे) हे चारजण जखमी झाले. या प्रकरणी सहायक पोलिस फौजदार संदिप साळवी यांनी जयगड पोलिस ठाण्यात तक्रार दिली. तक्रारीवरुन पोलिसांनी संशयित मुळे यांच्याविरुद्ध गुन्हा दाखल केला आहे.
