(रत्नागिरी)
शहरातील आरटीओ येथील ब्रिजच्या पुढे तरुणाला त्याच्या मैत्रिणीच्या मित्राने आणि अन्य दोघांनी असे तिघांनी मिळून रॉडने मारहाण केली. ही घटना दि. १५ सप्टेंबर रोजी रात्री ९.३० वा. सुमारास घडली. संकेत चव्हाण आणि इतर दोन अशी गुन्हा दाखल करण्यात आलेल्या संशयितांची नावे आहे. त्यांच्या विरोधात प्रथमेश निलमेश कांबळी (२४, रा. रत्नागिरी) याने शहर पोलिस ठाण्यात तक्रार दिली आहे.
त्यानुसार, १५ सप्टेंबर रोजी रात्री ९ वा. प्रथमेश कांबळी फोनवर आपल्या मैत्रिणीशी बोलत होता. तेव्हा त्यांच्यात भांडणे झाल्यानंतर तिचा मित्र संकेतने प्रथमेशला फोन करुन तु मला बाहेर भेट मी तुला बघतो असे बोलून शिवीगाळ केली. तेव्हा फिर्यादी प्रथमेश हा संशयित संकेतला भेटण्यासाठी त्याच्या घराजवळ जात असताना पाउस आल्याने तो आरटीओ ब्रिजच्या पुढे थांबला. दरम्यान, संकेतने पुन्हा प्रथमेशला फोन करुन तू कोठे आहेस असे विचारले. तेव्हा आपण ब्रिजपुढे असल्याचे प्रथमेशने त्याला सांगितले. काही वेळाने संकेत एका कारमधून आपल्या दोन मित्रांसह तिथे आला. कारमधून उतरल्यावर संकेतने आपल्याकडील रॉड प्रथमेशच्या डोक्यात मारला. त्यानंतर अन्य दोघांनीही प्रथमेशला शिवीगाळ करत लाथाबुक्कयांनी मारहाण केली.
