(संगमेश्वर / एजाज पटेल)
संगमेश्वर शहरात मोकाट गु्रांची समस्या आता चांगलीच ऐरणीवर आली आहे. लोकवस्तीसह शहरातील अंतर्गत रस्ते बाजारपेठ प्रत्येक ठिकाणी कळपा-कळपाने गुरे व लहान -लहान वासरे सैरवैर हिंडताना तसेच ठाण मांडून बसलेले पहायला मिळत आहेत. या गुरांचा कायमस्वरूपी बंदोबस्त करण्यासाठी ठोस उपाय योजना करण्यात याव्यात व पोलीस पाटील यांच्या मदतीने उनाड सोडण्यात आलेल्या गुरांच्या मालकांची नावे पोलीस ठाणे दप्तरी नोंद करण्यात यावेत या मागणीचे निवेदन संगमेश्वर पोलीस उपनिरीक्षक शंकर नागरगोजे यांच्याकडे सुपूर्द करण्यात आले.
संगमेश्वर परिसरात मोकाट सोडण्यात आलेली गुरे खाद्य शोधार्थ सर्वत्र सैरवैर भटकंती करत असतात. तर अनेकदा कळपा -कळपाने तसेच पादचारी व वाहन वर्दळीच्या रस्त्यावर रस्ता अडवून ऐसपैस ठाण मांडून बसलेले असतात. त्यामुळे वाहन वर्दळीला अडथळा तर निर्माण होतोच परंतु रात्रीच्या वेळी अपघात होण्यास ही कारण ठरत असून यापूर्वी अपघाताच्या घटनाही घडल्या आहेत.
या गु्रांचा त्रास लोकांना तर होतच आहे. परंतु बिचाऱ्या मुक्या जनावरांना सुद्धा अपघाताचा सामना करावा लागत आहे. सैरवैर भटकंती करणारी गुरे व त्यांच्याबरोबर अगदी काही दिवसांचे व महिन्याचे वासरूही मोकाट फिरत असतात. ही गुरे तसेच लहान वासरे अचानकपणे वाहनांच्या समोर येऊन अपघाताच्या घटना घडून त्यात बिचाऱ्या मुक्या गुरांना जीव गमवावा व जखमी होऊन जायबंदीही व्हावे लागत आहे.
संगमेश्वर परिसरतील दिवसांगणिक वाढत चाललेली मोकाट गुरांची संख्या अतिशय त्रासदायक ठरत असून याला वेळीच पायबंद घालण्यासाठी संगमेश्वरवासीय एकवटले असून नुकतेच संगमेश्वर पोलीस ठाण्यात निवेदन दिले असून आजूबाजूच्या गावातील पोलीस पाटील यांच्या मदतीने उनाड सोडण्यात आलेल्या गुरांच्या मालकांची नावे पोलीस ठाणे दप्तरी नोंद करण्यात यावे व गुरे उनाड सोडू नये या संदर्भात सूचना करावे असे निवेदनात नमूद करण्यात आले आहे.
संगमेश्वर पोलीस ठाणे उपनिरीक्षक शंकर नागरगोजे यांच्याकडे निवेदन सादर करताना अपर्णा अनिल भिडे, वि. ही.परिषद संगमेश्वर प्रखंड मातृशक्ती प्रमुख, श्री.उदय संसारे (माजी ग्रामविकास अधिकारी ), जेष्ठ नागरिक संघटनेचे कार्यवाह श्री.दादा कोळवणकर सदस्य, सुशांत उर्फ रिंकू कोळवणकर, गुरूप्रसाद (दादु ) भिंगार्डे, विवेक उर्फ बाळ्या शेट्ये, पंकज कोकाटे, सामाजिक कार्यकर्ते अमोल शेट्ये, स्वप्निल नारकर, संजय पाथरे, संतोष खातु, राहुल कुचेकर, विनीत खातु, संजय चौधरी, वैभव मुरकर, अभिषेक खातु, पिंका खातु, नितीन शेट्ये आदी उपस्थित होते.
