(रत्नागिरी)
नेवरे-कोलगेवाडीमार्गे कोतवडे रस्त्याने गणपतीपुळे येथे असताना अचानक येत गाडीसमोर बिबट्या आला. बिबट्याला पाहून गाडी चालकाची बोबडीच वळली आणि गाडी नियंत्रित करेपर्यंत बिबट्याच्या पुढ्यात जाऊन थांबली. प्रसंगावधान राखत दुचाकीस्वाराने गाडी फिरवून पुन्हा कोलगेवाडी गाठली आणि सुस्कारा टाकला. हा सर्व प्रकार शनिवारी रात्री साडेसात वाजण्याच्या दरम्यान, कोलगेवाडी (ता. रत्नागिरी) येथे घडला.
कोतवडे येथील ग्रामस्थ आणि गणपतीपुळे येथील पर्यटक निवासमधील कर्मचारी संदीप कृष्णा मोहित (४३, रा.गवाणवाडी-कोतवडे, रत्नागिरी) यांनी हा चित्तथरारक प्रसंग अनुभवला. ते शनिवारी रात्री ७:३० वाजण्याच्या दरम्यान नेवरे- कोलगेवाडी मार्गे कोतवडे या रस्त्याने गणपतीपुळेकडे येत होते. कोलगेवाडीच्या पुढे चढामध्ये अचानक त्यांच्या गाडीसमोर बिबट्या आला. त्याला बघिताच गाडीवर नियंत्रण मिळेपर्यंत गाडी त्या बिबट्याच्या समोर जाऊन थांबली. प्रसंगावधान राखत संदीप मोहित यांनी तशीच गाडी वळवून पुन्हा सुरू केली आणि तिथून परत कोलगेवाडी गाठली. घाबरलेल्या अवस्थेत आलेल्या संदीप मोहित यांना ग्रामस्थांनी धीर दिला. त्यानंतर, त्यांना घेऊन ग्रामस्थ घटनास्थळी आले. मात्र, बिबट्या तेथून निघून गेला होता. त्यानंतर, संदीप मोहित हे गणपतीपुळेकडे आले.
परिसरात मुक्त संचार
रत्नागिरी तालुक्यातील नेवरे, कोतवडे, गणपतीपुळे, निवेंडी, धामणसे या परिसरात बिबट्याचा संचार सुरू आहे. या परिसरात वेळोवेळी ग्रामस्थांना बिबट्याचे दर्शन होत आहे, तसेच या परिसरातील कोंबडी, कुत्रे, मांजरे बिबट्याने फस्त केल्याचे ग्रामस्थांनी सांगितले.
