(राजापूर / तुषार पाचलकर)
आज दिनांक 10/08/2024 रोजी सकाळी ०९.३० वाजण्याच्या सुमारास मौजे- रायपाटण येथील टक्केवाडी ता. राजापूर, येथील श्री.रामचंद्र बाळकृष्ण रोडे यांच्या घराच्या पच्छिमेला सांडपाण्यासाठी बांधण्यात आलेल्या सिमेंटच्या टाकीमध्ये वन्य प्राणी बिबटया मृत अवस्थेत पडला असल्याची माहिती पोलिस पाटील टक्केवाडी श्रीम.मृन्मयी पांचाळ यांनी परिमंडळ वन अधिकारी राजापूर यांना दूरध्वनी वरून दिली. त्यानी सदरची घटना परिक्षेत्र वन अधिकारी रत्नागिरी यांना कळवले. त्यांनंतर वनपाल राजापूर, वनरक्षक राजापूर व रेस्क्यू टीमसह घटनास्थळी येऊन पाहणी केली असता, सदरचा बिबट्या हा घराच्या पच्छिमेला सांडपाण्यासाठी बांधण्यात आलेल्या टाकीमध्ये असलेल्या पाण्यात गुदमरून मृत झाल्याचे दिसून आले. त्यानंतर वन अधिकारी यांनी सदर बिबट्याला दोरीच्या सहाय्याने टाकीच्या बाहेर काढून पाहणी केली असता,सदर मृत बिबट्या हा मादी असुन त्याचे वय साधारण अडीच ते तीन वर्ष आहे. पशुधन विकास अधिकारी राजापूर श्री.प्रभास किनरे यांचे मार्फत शवविच्छेदन केले.
सदरचा बिबट्या टाकीत असलेल्या पाण्यात गुदमरून मृत्यू झाल्याचे पशुवैद्यकीय अधिकारी राजापूर यांनी सांगितले. सदर बिबट्याचे शरीराचे सर्व अवयव सुस्थितीत असलेची खात्री केली.त्यानंतर मा. विभागीय वनअधिकारी रत्नागिरी (चिपळूण) श्रीम.गिरिजा देसाई व सहाय्यक वनसंरक्षक चिपळूण श्री.वैभव बोराटे ,वनक्षेत्रपाल रत्नागिरी श्री.किरण ठाकूर यांच्या मार्गदर्शनाखाली बिबट्यास लाकडाची चिता रचून त्याला जाळून नष्ट केले सदर कामगिरी साठी मा. सहाय्यक वनसंरक्षक श्री.वैभव बोराटे रत्नागिरी चिपळूण, वनक्षेत्रपाल श्री.किरण ठाकूर, वनपाल राजापूर श्री.जयराम बावदाणे ,वनरक्षक राजापूर श्री. विक्रम कुंभार, व रेस्क्यू टीमचे श्री.दीपक चव्हाण, श्री.विजय म्हादये, श्री.दीपक म्हादये, श्री.गणेश गुरव, श्री.निलेश म्हादये ,निलेश चांदे सरपंच रायपाटन, मृन्मयी पांचाळ-पोलिस पाटिल टक्केवाडी उपस्थित होते.
अशा प्रकारच्या घटना घडल्यास किंवा वन्यप्राणी अडचणीत सापडल्यास वन विभागाचा टोल फ्री क्रमांक १९२६ किंवा ९४२१७४१३३५ या क्रमांकावर संपर्क साधण्याचे आवाहन वन विभागाच्या वतीने श्री.किरण ठाकूर वनक्षेत्रपाल रत्नागिरी यांनी केली आहे.
