साडेतीन मुहूर्तांपैकी एक असलेल्या अक्षय्य तृतीयेला पूजा आणि खरेदीसाठी ‘हा’ असेल शुभ मुहूर्त

(रत्नागिरी)

हिंदू कॅलेंडरनुसार, अक्षय तृतीया हा सण आज मंगळवारी साजरा होत आहे. हिंदू धर्मात अक्षय्य तृतीयेच्या सणाला विशेष महत्त्व आहे. या दिवशी सोने-चांदी खरेदी करणे शुभ मानले जाते. हिंदू धर्मात गुढी पाडवा, दसरा अर्थात विजयादशमी, बलिप्रतिपदा आणि अर्धा मुहूर्त अक्षय तृतीया हे साडेतीन मुहूर्त मानले जातात. या दिवशी नव्या कामाची सुरुवात, शुभकार्य आणि नव्या वस्तूंची खरेदी केली जाते. या प्रत्येक मुहूर्ताचं खास असं वैशिष्ट्य आहे. त्यात अक्षय्य तृतीया ही तिथी खूपच शुभ मानली गेली आहे.

या दिवशी विवाह, मुंज आणि गृहप्रवेशासारखी शुभकार्यं करायची असतील, तर वेगळा मुहूर्त काढण्याची गरज नसते. या दिवशी काही जण घरात विशेष पूजा, जप, होम आदी विधी करतात. अक्षय्य तृतीयेला पितरांना केलेलं पिंडदान विशेष फलदायी असतं, असं पुराणात लिहिलेलं आहे. दरवर्षी वैशाख महिन्यातील शुक्ल पक्षातील तृतीया तिथीला अक्षय्य तृतीया म्हणतात. या दिवशी लक्ष्मीची पूजा केल्याने सुख-समृद्धी प्राप्त होते. धर्मग्रंथानुसार भगवान परशुरामाचा जन्मही याच दिवशी झाला होता.