(नवी दिल्ली)
भारतीय नौदल, एनसीबी आणि गुजरात एटीएसने संयुक्त कारवाई करत गुजरातच्या कच्छमधून अमली पदार्थांचा मोठा साठा जप्त केला आहे. जप्त केलेले ड्रग्ज तब्बल 3100 किलो आहे. भारतीय उपखंडातील अंमली पदार्थांची ही आतापर्यंतची सर्वात मोठी कारवाई आहे. याची आंतरराष्ट्रीय बाजारातील किंमत 2000 कोटी रुपयांपेक्षा जास्त असल्याचा अंदाज आहे.
भारतीय नौदलाकडून मिळालेल्या माहितीनुसार, जप्त केलेले औषध इराणमधून आणले जात होते. माहिती मिळाल्यानंतर कारवाई करण्यात आली. ही बोट दोन दिवस समुद्रात होती. यानंतर भारतीय नौदलाने संशयास्पद बोट भारताच्या हद्दीत घुसल्यावर तिला थांबवून तपासणी केली. तपासादरम्यान जहाजातून कोट्यवधी रुपयांचे ड्रग्ज जप्त करण्यात आले. कारवाई करत बोटीतील 5 क्रू मेंबर्सना ताब्यात घेतले आहे पकडलेल्या जहाजातून ताब्यात घेतलेले पाच आरोपी पाकिस्तानी असल्याचा संशय असून, त्यांना गुजरातमधील पोरबंदर येथे नेण्यात आले आहे.
भारतीय सुरक्षा एजन्सी अटक केलेल्या आरोपींकडून ड्रग्ज आणि त्यांची व्यक्तिगत माहिती गोळा करत आहेत. ड्रग्ज कुठे आणि कोणाकडे पाठवायचे आणि ड्रग्ज कोण घेत होते, तसेच या ड्रग्जशी इतर किती लोक जोडलेले आहेत आदी माहिती सुरक्षा एजन्सी घेत आहे. जप्त केलेल्या ड्रग्जवर ‘Produce of Pakistan’ असे लिहिले आहे. जप्त केलेल्या अमली पदार्थांमध्ये 2950 किलो चरस, 160 किलो मेथॅम्फेटामाइन, 25 किलो मॉर्फिनचा समावेश आहे. उल्लेखनीय म्हणजे याआधीही भारतीय नौदलाने भारतीय सागरी हद्दीत अनेक कारवाईत कोट्यवधी रुपयांचे ड्रग्ज जप्त केले आहेत. ड्रग माफिया सागरी मार्गाने भारतात अंमली पदार्थ घुसवण्याचा प्रयत्न करतात, मात्र भारतीय सुरक्षा यंत्रणांच्या सतर्कतेमुळे त्यांचे प्रयत्न फसले आहेत
