गुगलने आपले पेमेंट ॲप GPay बंद करण्याचा निर्णय घेतला आहे. Google चे हे पेमेंट ॲप 4 जून 2024 रोजी बंद होईल. गुगलचे हे पेमेंट ॲप बंद झाल्यामुळे लाखो यूजर्सना त्रास होऊ शकतो. टेक कंपनीचा हा निर्णय 2022 मध्ये लॉंच झालेल्या Google Wallet ॲपमुळे घेण्यात आला आहे. गुगल वॉलेटसोबतच गुगल पे ॲपही अनेक देशांमध्ये काम करत आहे. Google ने स्टँडअलोन GPay ॲप बंद करण्याची घोषणा केली आहे.
गुगलने हा निर्णय फक्त अमेरिकन युजर्ससाठी घेतला आहे. 4 जूननंतर हे ॲप फक्त भारत आणि सिंगापूरमध्ये काम करेल. GPay चे स्टँडअलोन ॲप इतर देशांमध्ये उपलब्ध असणार नाही. आपल्या ब्लॉग पोस्टमध्ये ही माहिती देताना Google ने म्हटले आहे की GPay द्वारे केले जाणारे पीअर-टू-पीअर (P2P) पेमेंट आणि खाते व्यवस्थापन बंद केले जाईल. तथापि, युजर्स 4 जून 2024 नंतरही त्यांची GPay शिल्लक त्यांच्या खात्यात हस्तांतरित करू शकतील. यासाठी वापरकर्त्यांना Google Pay वेबसाइट वापरावी लागेल. आपल्या ब्लॉगमध्ये, Google ने म्हटले आहे की GPay ची जागा 180 देशांमध्ये Google Wallet ने घेतली आहे.युजर्स Google Wallet ॲपद्वारे Google Pay सेवा वापरण्यास सक्षम असतील. म्हणजेच जीपे ला पर्याय म्ह्णून Google Wallet हे असणार आहे. GPay द्वारे केवळ डेबिट आणि क्रेडिट कार्ड टॉप-अप केले जात नाही. उलट, हे गुगल ॲप ट्रान्सपोर्ट पास, स्टेट आयडी, ड्रायव्हर लायसन्स, व्हर्च्युअल कार की यासह अनेक सेवा प्रदान करते.
गुगलने प्रसिद्ध केलेल्या एका ब्लॉग पोस्टमध्ये म्हटले की, अमेरिकेत यापुढे गुगल पे ॲपऐवजी गुगल वॉलेट ॲप वापरण्यात यावे. गुगल पे मधील बॅलन्स इतर ठिकाणी वळविण्यात यावा. अमेरिकेत जरी गुगल पे बंद होणार असले तरी भारत आणि सिंगापूरमध्ये ॲप सुरुच राहणार आहे. भारत आणि सिंगापूरमधील आमच्या कोट्यवधी ग्राहकांना या नव्या बदलांचा कोणताही फरक पडणार नाही. भारतातील ग्राहक गुगल पेच्या मदतीने पैसे स्वीकारू शकतात आणि पाठवू शकतात.
गुगलने आपले पेमेंट ॲप बंद करण्याचा निर्णय घेण्याची ही पहिलीच वेळ नाही. Google ने 2011 मध्ये पहिल्यांदा Google Wallet लाँच केले. यानंतर Google ने 2015 मध्ये Android Pay ॲप लाँच केले, ज्यामध्ये Google Wallet इंटिग्रेटेड होते. यानंतर 2016 मध्ये गुगलने गुगल वॉलेट कार्ड बंद केले. आता कंपनीने पुन्हा एकदा आपल्या सर्व सेवा गुगल वॉलेटमध्ये समाकलित करण्याचा निर्णय घेतला आहे.
Google ने प्रथम Tez ॲप भारतात लाँच केले, ज्याचे नंतर Google Pay असे नामकरण करण्यात आले. आता ते GPay नावाने Google Play Store वर उपलब्ध आहे. भारतात Google Pay ॲपद्वारे UPI पेमेंट करता येते.
