(रत्नागिरी)
तालुक्यातील निवळी येथील धबधब्याजवळ असणाऱ्या नदीत बुधवारी (८ नोव्हेंबर) रात्री ८:४५ वाजण्याच्या सुमारास एका अज्ञात पुरुषाचा मृतदेह सापडला आहे. याबाबत रत्नागिरी ग्रामीण पोलिस स्थानकात नोंद करण्यात आली असून, या मृतदेहाची अद्याप ओळख पटलेली नाही.
या घटनेबाबत पोलिस पाटील शितप यांनी पोलिसांना माहिती दिली. निवळी येथील कोकजेवठार गावातून वाहणाऱ्या नदीपात्रात शेतीच्या बाजूला पुरुषाचा मृतदेह सापडला आहे. पोलिस पाटील शितप यांनी ग्रामस्थांच्या मदतीने कड्याची आड येथे नदीत जाऊन याबाबत खात्री केली. हा मृतदेह अंदाजे ४५ ते ५० वर्षे वयाच्या पुरुषाचा असून, गावातील व परिचयाचा नसल्याचे ग्रामस्थांनी सांगितले आहे.
ग्रामीण पोलिसांना याबाबत माहिती दिल्यानंतर त्यांनी घटनास्थळी जाऊन पंचनामा केला. या मृतदेहाची ओळख पटविण्याचे काम पोलिसांकडून सुरू आहे. तो स्थानिक नसल्याने पोलिसांसमोरील प्रश्नचिन्ह कायम आहे. याबाबत अधिक तपास ग्रामीण पोलिस करत आहेत.
