( मंडणगड )
मंडणगड एसटी स्टँड समोर एकाला मॅक्सिमो गाडीसह अवैध तंबाखूजन्य पान मसाल्याची वाहतूक करताना पोलिसांनी ताब्यात घेतले. त्याच्याकडे सुमारे पावणे तीन लाखाचा अवैध तंबाखूजन्य पदार्थ आढळून आले.
पोलिसांनी दिलेल्या माहितीनुसार, मंडणगड एसटी स्टँड समोरील चौकात महिंद्रा मॅक्सिमो गाडी (एमएच 08, डब्ल्यू 2607) पोलिसांना आढळून आली. पोलिसांनी या गाडीची चौकशी केली असता गाडीमध्ये आरोग्यास हानिकारक असलेला विमल पान मसाला (केशरी रंग) 42 पाकीट, केसरयुक्त विमल मसाला (जांभळ्या रंगाचा) 39 पाकीट, तंबाखूची (निळा, हिरवा, केशरी) रंगाची 117 पाकीट, तसेच चारचाकी महिंद्रा मॅक्सिमो 2 लाख 50 हजार रुपये असा एकूण 2 लाख 73 हजार 216 रुपये किमतीच्या मुद्देमालासह चालक कमलाकर गोयल (41, कालकाई कोंड, दापोली) याला ताब्यात घेण्यात आले.
याबाबतची फिर्याद पोलीस हवालदार धनंजय सावंत यांनी मंडणगड पोलीस स्थानकात दिली. त्यानुसार चालक गोयल याच्यावर भादवी कलम 328, 272, 273, 188 नुसार गुन्हा दाखल करण्यात आले आहे. याबाबतचा अधिक तपास पोलीस निरीक्षक सावंत करत आहेत.
