(खेड / भरत निकम)
खेड तालुक्यातील नांदगाव मोहल्ला येथील बस थांब्यावरच्या निवारा शेडमध्ये बसलेल्या ५० वर्षीय प्रौढास मारहाण करण्यात आली आहे. इनायत्तुल्ला सय्यद अब्दुल रहिमान कादिरी असे मारहाण केलेल्या प्रौढाचे नाव आहे. ही घटना दि. १६ सप्टेंबर रोजी रात्रौ ९ वाजताच्या सुमारास घडली.
खेड पोलिसांनी दिलेल्या माहितीनुसार, खेड तालुक्यातील खाडीपट्टा भागात जाणाऱ्या रस्त्यावर एसटीच्या बस थांब्यावर प्रवाशांना निवारा शेड आहे. या शेडमध्ये इनायत्तुल्ला सय्यद अब्दुल रहिमान कादिरी हे बसलेले होते. तेथे गावातील इरफान सय्यद इस्माईल कादिरी (४०, रा. नांदगाव) याने तेथे येऊन ‘तुझी खूप नाटकं वाढली आहेत. तुझे हातपाय तोडून तुझ्या हातात देईन’, असे धमकावले. तसेच इनायत्तुल्ला यांच्या डोळ्याला दुखापत झाल्यास कायमचे अंधत्व येऊ शकते, हे माहीत असूनही त्यांच्या डाव्या डोळ्यावर हाताच्या थापटाने जबर मारहाण केली होती. या मारहाणीत ते जखमी झाले आहेत.
याप्रकरणी खेड पोलिस ठाण्यात गुन्हा रजिस्टर नंबर २९६ नुसार तक्रार दाखल झाली आहे. पोलिसांनी भादवि कलम ३२५, ३२३ व ५०६ अन्वये गुन्हा दाखल केला आहे.
