(वॉशिंग्टन)
या छायाचित्रात मस्क सोफ्यावर बसले आहेत. त्यांच्या मांडीवर एक मूल आहे, तर शिवोन जिलीस यांच्याजवळ एक मूल आहे. आणखी एका शेअर केलेल्या फोटोत त्यांचा मुलगा रोबोटकडे पाहत आहे आणि त्याच्या मागे मस्क उभे आहेत. स्ट्रायडर आणि एज्योर अशी या दोन्ही मुलांची नावे आहेत. इलन मस्कच्या चरित्रातील काही प्रकाशित उताऱ्यांवरून हे फोटो ऑस्टिन, टेक्सास येथील जिलीसच्या घरी घेतल्याचे स्पष्ट झाले आहे.
शिवॉन जिलीस यांच्याशी मस्क यांचा विवाह झालेला नाही. शिवॉन जिलीस यांनी २०२१ मध्ये आयव्हीएफ द्वारे या जुळ्या मुलांना जन्म दिला. इलन मस्क यांनी या जुळ्या मुलांबद्दल उघडपणे काहीही सांगितले नव्हते. शिवॉन जिलीससोबतच्या नात्यातील जुळ्या मुलांची बातमी सार्वजनिक झाल्यानंतर इलन मस्क यांना आता एकूण नऊ मुले असल्याचे स्पष्ट झाले आहे. याआधी इलन मस्क यांना त्यांची पूर्व पत्नी, कॅनेडियन लेखिका जस्टिन विल्सनपासून पाच मुले आहेत. तसेच त्यांची गर्लफ्रेंड कॅनेडियन सिंगर ग्राइम्सला एक मुलगा आणि एक मुलगी अशी दोन मुले आहेत. २०२२ मध्ये इलन मस्क यांनी एक ट्विट केले होते. त्यात त्यांनी असे लिहिले होते की, लोकसंख्येच्या संकटाशी लढण्यासाठी मी सर्वतोपरी प्रयत्न करत आहे. या ट्विटनंतर सोशल मीडियावर वेगवेगळ्या प्रकारच्या चर्चा सुरू झाल्या होत्या.
