(संगमेश्वर / प्रतिनिधी)
तालुक्यातील कडवई गावचा सुपुत्र तईब अझीम जुवळे याची अठरा वर्षाखालील भारतीय फुटबॉल संघात निवड झाली असून तैवान येथे सुरू असलेल्या आशिया चषक स्पर्धेत तो भारतीय संघाचे नेतृत्व करत आहे. त्याच्या या निवडीचे सर्वच स्तरातून कौतुक केले जात आहे.
कडवई येथील प्रसिद्ध क्रिकेट पट्टू कै. अझीम मन्सूर जुवळे यांचा सुपुत्र तईब हा सध्या मुंबई येथे कायमस्वरूपी वास्तव्यास असून त्याचे शिक्षण सुरू आहे. त्याला लहानपणापासूनच फुटबॉल या खेळाची आवड होती. त्याने शिक्षण घेत असतानाच फुटबॉल खेळामध्ये विविध स्पर्धामधून प्राविण्य मिळवले आहे. भारतीय फुटबॉल असोशियनने याची दखल घेत नुकतीच अठरा वर्षाखालील भारतीय फुटबॉल संघात निवड करण्यात आली आहे. अठरा वर्षाखालील भारतीय फुटबॉल संघाचे नेतृत्व करण्याची संधी त्याला मिळाली आहे. तैवान येथे सुरू असलेल्या आशिया चषक क्रीडा स्पर्धेसाठी तईब तैवानला रवाना झाला आहे.
तईबच्या या यशामुळे कडवई गावाचे शिरपेचात मानाचा तुरा खोवला गेला आहे. त्याच्यावर पंचक्रोशीतून अभिनंदनाचा वर्षाव होत आहे. त्याच्या पुढील वाटचालीसाठी अनेक मान्यवरांनी सुभेच्छा दिल्या आहेत.
