(रत्नागिरी / जगदीश कदम)
ऑडिओलॉजी या शास्त्राचे कोणतेही तपासणी केंद्र आजवर या जिल्ह्यात झालेले नाही. म्हणूनच ही समस्या दूर करण्यासाठी इन्फिगो आय केअर हॉस्पिटलने उचललेले हे पहिले पाऊल लोकोपयोगी आहे. आजवर बघण्याची काळजी घेताना यापुढे ऐकण्याचीही काळजी या हॉस्पिटलमध्ये घेतली जाणार आहे. अनुजा धनंजय कुलकर्णी यांच्या माध्यमातून सुरु झालेल्या या श्रवण सेवा केंद्राचा लाभ जिल्ह्यातील गरजू रुग्णांनी घ्यावा असे आवाहन जिल्हाधिकारी एम देवेंद्र सिंह यांनी केले.
ऐकण्याबाबतची समस्या नेमकी काय आहे याचा अभ्यास करून त्यानुसार उपचार करण्यासाठी तळ कोकणातील पहिले ईझी ऑडिओ हिअरिंग क्लिनिक हे अद्ययावत ऑडिओलॉजी सेंटर रविवार दि. २० ऑगस्टपासून रत्नागिरीत सुरू झाले आहे. जनतेच्या सेवेसाठी इन्फिगो हॉस्पिटलला अनुजा धनंजय कुलकर्णी यांच्या माध्यमातून हे केंद्र सुरू झाले आहे. या ऑडिओलॉजी तपासणी केंद्राचे उद्घाटन जिल्हाधिकारी एम देवेंद्र सिंह यांच्या हस्ते झाले. यावेळी ते बोलत होते. यावेळी आयोजित कार्यक्रमाच्या व्यासपीठावर जिल्हा पोलीस अधीक्षक धनंजय कुलकर्णी, जि.प.मुख्य कार्यकारी अधिकारी कीर्ती किरण पुजार, अतिरिक्त पोलीस अधीक्षक जयश्री गायकवाड, इन्फिगोचे व्यवस्थापकीय संचालक डॉ. श्रीधर ठाकूर हे मान्यवर उपस्थित होते.
प्रास्ताविक करताना इन्फिगो आय केअर ग्रुपचे व्यवस्थापकीय संचालक डॉ. श्रीधर ठाकूर यांनी सांगितले की, ऑडिओलॉजी हे स्वतंत्र शास्त्र आहे. जसे डोळ्याच्या आजाराकडे लोक दुर्लक्ष करतात तसेच कानाबाबतही कमी ऐकू येणे यासारख्या समस्या टोकाला गेल्यानंतरच त्यावरील उपचाराची गरज लोकांना वाटते. अशा उपचारांसाठी दुसऱ्या जिल्ह्यात जाणे अधिक खर्चिक असल्याने रुग्णांचा जुजबी उपचार करण्यावर भर असतो. लोकांना नीट बघता यावे म्हणून सुरू झालेल्या हॉस्पिटलने आता लोकांना नीट ऐकता यावे यासाठी हे नवे दालन सुरू करण्याचा निर्णय घेतला आहे.
रत्नागिरीतील हे नवीन ऑडिओलॉजी क्लिनिक सर्व प्रकारच्या ऑडिओलॉजिक चाचण्या, मूल्यमापन, विविध कमी ऐकून येण्याच्या समस्यांवर उपाय करण्यासाठी पूर्णपणे सुसज्ज आहे. ही सेवा इन्फिगोच्या रत्नागिरीसह खेड आणि लांजा येथील हॉस्पिटलमध्ये उपलब्ध असणार आहे. यावेळी जिल्हाधिकारी यांच्यासह मुख्य कार्यकारी अधिकारी यांनी आपले मनोगत व्यक्त करुन या उपक्रमाला शुभेच्छा दिल्या. यावेळी जिल्हा प्रशासनातील प्रमुख अधिकारी यांच्यासह विविध क्षेत्रातील मान्यवर उपस्थित होते.
ऑडिओलॉजीस्ट असलेल्या अनुजा धनंजय कुलकर्णी या रत्नागिरी जिल्हा पोलीस अधीक्षक यांच्या कन्या आहेत. त्यांनी परदेशी न जाता आपल्याच देशात, गावात यासाठी काम करण्याचा निर्णय घेतला. त्यांच्या या निर्णयाचे स्वागत करुन सहाय्यक कर्मचाऱ्यांची तज्ञ टीम रत्नागिरी जिल्ह्यासाठी उपलब्ध करून दिली आहे. केवळ व्यवसायाचे नाही तर सेवेचे नवीन दालन उभे करून दिल्याचा अभिमान असल्याचे मत इन्फीगो आय केअरचे व्यवस्थापकीय संचालक डॉ. श्रीधर ठाकूर यांनी व्यक्त केले.
