(पुणे)
प्रसिद्ध समाजसेवक, हॅलो मेडिकल फाऊंडेशनचे संस्थापक डॉ. शशिकांत अहंकारी यांचे पुण्यात निधन झाले. अहंकारी यांना कर्करोग झाला होता. डॉ. शशिकांत अहंकारी हे उस्मानाबाद जिल्ह्यातील तुळजापूर तालुक्यातील अणदूरचे रहिवासी होते. त्यांच्यावर आज अणदूर येथे अंत्यसंस्कार होणार आहे. डॉ. शशिकांत अहंकारी यांनी अणदूरमध्येच आपल्या पत्नीसोबत हॅलो मेडिकल फाऊंडेशनची स्थापना केली होती.
ग्रामीण भागातील लोकांना तज्ज्ञ डॉक्टरांची सेवा मिळावी, या उद्देशाने डॉ. शशिकांत अहंकारी यांनी १९९३ मध्ये हॅलो फाऊंडेशनची स्थापना केली होती. हॅलो मेडिकल फाउंडेशनमधील त्यांच्या कामामुळे डॉ. शशिकांत अहंकारी यांचा राज्य शासनाच्या चार समित्यांमध्ये सदस्य म्हणून समावेश करण्यात आला होता. त्यांनी आतापर्यंत पंधरा आंतरराष्ट्रीय परिषदांमध्ये हॅलो मेडिकल फाऊंडेशनचे कार्य सादर केले. याशिवाय, डॉ. अहंकारी आणि हॅलो मेडिकल फाऊंडेशनने महिला सक्षमीकरणासाठी कार्यरत असलेल्या सर्वोत्कृष्ट एनजीओसाठी महाराष्ट्र फाऊंडेशन पुरस्कारासह अनेक पुरस्कार मिळाले होते.
