(खेड / भरत निकम)
आयशर ट्रकला झालेल्या धडकेत दुचाकीस्वाराचा दुर्दैवी अंत झाल्याची घटना खेड-मंडणगड मार्गावर धामणी येथे आज (मंगळवारी २५ जुलै रोजी) सायंकाळी ५ वाजताच्या सुमारास घडली. रोहित राजेंद्र बिरवटकर ( २१, रा. पोयनार आलाटीवाडी, ता. खेड ) असे जागीच मृत्युमुखी पडलेल्या युवकाचे नाव आहे.
पोलीस सूत्रांकडून मिळालेल्या माहितीनुसार, आयशर ट्रक नंबर एमएच ०४ केएफ ९८६५ हा मंडणगडहुन सिमेंट उतरवून खेडच्या दिशेने भरधाव वेगाने येत होता. याच दरम्यान खेडहून दुचाकीस्वार रोहित बिरवटकर हा आपले वडील राजेंद्र बिरवटकर यांना घेऊन खेडवरून पालगडच्या दिशेने जात होता. धामणी येथे आल्यावर गाडीच्या वेगावर नियंत्रण न राहील्याने रोहितच्या ताब्यातील बाईकने ट्रकच्या उजव्या बाजूला धडक दिली. ही धडक इतकी जोरदार होती की रोहितच्या डोक्याला गंभीर दुखापत झाल्याने त्याचे जागीच निधन झाले तर मागे बसलेले त्याचे वडील राजेंद्र बिरवटकर यांच्या हाताला फ्रॅक्चर झाले आहे.
मयत रोहित याचे शवविच्छेदनासाठी कळबनी उपजिल्हा रुग्णालयात पाठविण्यात आले होते. शवविच्छेदनानतर मृतदेह नातेवाईकांच्या ताब्यात देण्यात आला. या अपघाताचा अधिक तपास खेड पोलीस करीत आहेत.
फोटो : अपघातग्रस्त दुचाकी, दुचाकीस्वार आणि ट्रक
