( गुहागर )
तालुक्यातील मोडकाघर येथे दुचाकीस्वाराने बोलेरो व सुप्रिमो महेंद्र या 2 वाहनांना धडक दिल्याने झालेल्या अपघातात दुचाकीस्वार गंभीर जखमी झाला. हा अपघात शुक्रवारी सायंकाळी 6.15 वा. झाला. यात दुचाकीचे मोठ्या प्रमाणात नुकसान झाले. सुमीत जोशी (30, गुहागर- कीर्तनवाडी) असे जखमी दुचाकीस्वाराचे नाव आहे. सुमित हा आपली दुचाकी (एम.एच. 08 ए 1 2085) घेऊन शृंगारतळीहून गुहागरकडे जात होता. याचदरम्यान, महेंद्र बोलेरो गाडी गुहागरकडून शृंगारतळीकडे, तर महेंद्र सुप्रिमो ही गाडी गुहागरच्या दिशेने जात होती. दुचाकीस्वार इतका वेगात होता की, त्याने प्रथम बोलेरोला धडक दिली. बोलेरो चालकाने त्याला वाचवण्याचा खूप प्रयत्न केला. मात्र दुचाकी वेगात असल्याने यामध्ये बोलेरोचे स्टेअरींग लॉक झाले. याचवेळी वेगाने असणारा सुमित सुप्रिमो गाडीवर चालकाच्या दिशेने आदळला. त्यामुळे दुचाकीचे मोठे नुकसान झाले. शिवाय दुचाकीस्वाराचा हात व पायाला गंभीर दुखापत झाली. तसेच पायाची दोन्ही बोटे मोडली. जखमी दुचाकीस्वारावर शृंगारतळी येथील रुग्णालयात उपचार सुरु आहेत.
