(नवी दिल्ली)
रेल्वे मंत्रालयाने ७५ वंदे भारत एक्सप्रेस १५ ऑगस्ट २०२३ पर्यंत प्रत्येक राज्यासाठी सुरू करण्याचे लक्ष्य ठेवले आहे. वंदे भारत एक्सप्रेस ही पहिली स्वदेश निर्मित अर्ध-हाय स्पीड ट्रेन आहे. नाविन्यपूर्ण असलेली ही गाडी अनेक नवीन सोयी सुविधांनी अद्ययावत आहे. तसेच भारतीय रेल्वेच्या दृष्टीने परिपूर्ण आहे.
राष्ट्रीय वाहतूकदार या वर्षाच्या सुरुवातीपासून दर महिन्याला निळ्या आणि पांढऱ्या रंगाच्या गाड्या सुरू करत आहे. आर्थिक वर्ष २०२३ – २४ मध्ये, रेल्वेने २९ मे पर्यंत सात ट्रेन सुरू केल्या आहेत. रेल्वे मंत्रालयाने १५ ऑगस्ट २०२३ पर्यंत प्रत्येक राज्यात नवीन युगाची ही ट्रेन सुरू करण्याचे लक्ष्य ठेवले आहे. स्वातंत्र्य दिनापर्यंत अशा ७५ गाड्या सुरू करण्याची योजना आखली आहे. रांची-हावडा, पाटणा-हावडा, मुंबई-मडगाव आणि अन्य अनेक मार्गांवर वंदे भारत एक्सप्रेस सुरू होणार आहे.
वंदे भारत एक्सप्रेसचे सध्या उत्पादन वाढवण्यास सुरुवात करण्यात आली आहे. चालू आर्थिक वर्षात रेल्वेने सेमी-हाय स्पीड गाड्यांचे उत्पादन वाढवले आहे. सध्या कारखान्यातून दर आठव्या किंवा नवव्या दिवशी एक नवीन गाडी येत आहे. रायबरेली-आधारित मॉडर्न कोच फॅक्टरी आणि लातूर-आधारित मराठवाडा रेल कोच फॅक्टरी या दोन कारखान्यांमध्ये उत्पादन कार्य सुरू करण्यासाठी प्रयत्न जोरात सुरू आहेत. सध्या या ट्रेनचे उत्पादन चेन्नईस्थित इंटिग्रल कोच फॅक्टरी (ICF) येथे केले जात आहे.
या वर्षाच्या सुरुवातीला, रेल्वेवरील संसदीय स्थायी समितीने राष्ट्रीय वाहतूकदारांना लक्ष्य आणि रेल्वे प्रवाशांच्या आकांक्षा पूर्ण करण्यासाठी या नवीन ट्रेनचे अधिक उत्पादन वाढवण्यास सांगितले आहे.
