(नवी दिल्ली)
कर्मचारी भविष्य निर्वाह निधी संघटनेचे (EPFO) सदस्य कर्मचारी भविष्य निर्वाह निधीचे पैसे जमा होण्याची वाट पाहत आहेत. परंतु अद्याप पैसे मिळणे बाकी आहे. 2021-22 या आर्थिक वर्षाचे पैसेही ग्राहकांच्या खात्यात उशिरा आले. त्यामुळे या वेळीही त्यांना परतावा कधी मिळेल याबाबत त्यांच्यामध्ये संभ्रम आहे.
EPFO ने याबाबत ,माहिती दिली की, CBT ने आर्थिक वर्ष 2022-23 साठी EPF वर वार्षिक 8.15 टक्के दराने व्याज निश्चित केले आहे. अर्थ मंत्रालयाच्या मंजुरीनंतर ते अधिसूचित केले जाईल. यानंतर EPFO व्याजाचे पैसे ग्राहकांच्या खात्यात पाठवेल. कर्मचारी भविष्य निर्वाह निधी संघटना (EPFO) च्या CBT ने आर्थिक वर्ष 2023 साठी EPF खात्यावरील व्याजदर 8.10% वरून 8.15% पर्यंत वाढवला आहे. या वर्षी मार्चमध्ये, EPFO ने आर्थिक वर्ष 2022-23 साठी 8.15% व्याजदर निश्चित करण्याची घोषणा केली होती.
तुमचे व्याजाचे पैसे आले आहेत की नाही हे पाहण्यासाठी तुम्ही तुमच्या पीएफ खात्याचे पासबुक तपासू शकता. यासाठी तुम्ही EPFO च्या अधिकृत वेबसाइटला भेट देऊ शकता. किंवा 7738299899 या क्रमांकावर ‘EPFOHO UAN ENG’ संदेश देखील पाठवू शकता. याशिवाय उमंग अॅपद्वारेही पीएफ खात्यात प्रवेश करता येतो.
पीएफ शिल्लक ऑनलाइन तपासा
- ईपीएफओची अधिकृत वेबसाइट epfindia.gov.in वर जा.
- ‘Our Services’ टॅबवर क्लिक करा. यानंतर ‘For Employees’ हा पर्याय निवडा.
- नवीन पेज उघडल्यावर तुम्हाला ‘Member Passbook’ वर क्लिक करावे लागेल. येथे तुम्हाला तुमचा युनिव्हर्सल अकाउंट नंबर आणि पासवर्ड टाकावा लागेल.
यानंतर पासबुक ओपन होईल. यामध्ये तुम्हाला तुमच्या कंपनीकडून आणि तुमच्या बाजूने किती योगदान दिले गेले आहे आणि त्यावर किती व्याज मिळाले आहे हे दिसेल. जर तुमचे व्याज ईपीएफओने जमा केले असेल तर ते त्यात दिसून येईल.
