मनी लाँड्रींग प्रकरणात महाराष्ट्राचे माजी गृहमंत्री अनिल देशमुख यांना ईडीने पुन्हा एकदा समन्स बजावलं आहे. ईडीचे अधिकारी आज देशमुख यांची चौकशी करणार आहेत. काही दिवसांपूर्वी ईडीने अनिल देशमुखांच्या नागपूर आणि मुंबई येथील घरांवर छापेमारी केली होती. NIA च्या अटकेत असलेला पोलीस अधिकारी सचिन वाझेकडून १०० कोटी मागितल्याचा आरोप अनिल देशमुखांवर आहे.
अनिल देशमुखांनी सचिन वाझेंकडून मिळालेला पैसा बोगस कंपन्यांद्वारे आपल्या कुटुंबियांच्या नावावर वळवला. ईडीने या प्रकरणात अनिल देशमुख यांचे सहकारी कुंदन शिंदे आणि संजीव पालांडे यांना अटक केली आहे. अनिल देशमुख यांनाही काही दिवसांपूर्वी समन्स बजावण्यात आलं होतं. परंतू देशमुखांच्या वकिलांनी या समन्सला उत्तर देत आता हजर राहता येणं शक्य होणार नसल्याचं सांगितलं. यानंतर ईडीने आज पुन्हा एकदा अनिल देशमुखांना समन्स बजावलं आहे.
