(रत्नागिरी / प्रतिनिधी)
हातखंबा तारवेवाडी येथे जंगलभागात वणवा लागून एका शेतकऱ्याचा होरपळून मृत्यू झाल्याची दुर्दैवी घटना समोर आली आहे. ही आग नेमकी कशामुळे लागली आहे याबाबत अद्याप माहिती मिळू शकलेली नाही. मात्र रत्नागिरी तालुक्यातील हातखंबा मधील तारवेवाडी येथे ही घटना घडली आहे. गोविंद विश्राम घवाळी असं ६५ वर्षीय मृत शेतकऱ्याचं नाव आहे. आगीमध्ये वृद्धाचा मृत्यू झाल्याने गावामध्ये हळहळ व्यक्त होत आहे. या घटनेची माहिती मिळताच पोलीस पाटील, तलाठी, सरपंच यांनी घटनास्थळी धाव घेतली आहे.
रत्नागिरी तालुक्यातील हातखंबा तारवेवाडी येथील शेतकरी गोविंद कृष्णा घवाळी नेहमी प्रमाणे आपल्या शेतात गेले होते. आज सकाळी ( २१ फेब्रुवारी) बाराच्या सुमारास जंगलातील एका बागेतील गवताला आग लागली या आगीतून सर्वत्र वणवा पसरला. या वणव्यावर नियंत्रण मिळवण्यासाठी गोविंद घवाळी प्रयत्न करत होते. मात्र हवेमुळे वणव्याला आणखी जोर मिळत असल्याने या लागलेल्या वणव्यातून घवाळी यांचा होरपळून मृत्यू झाल्याचे सांगण्यात येत आहे.
घटनेची माहिती पोलीस प्रशासनाला देण्यात आली असून घटनास्थळी पोलिस दाखल झाले आहेत. पुढील तपास ग्रामीण पोलीस करीत आहेत.
