(रत्नागिरी)
संपूर्ण महाराष्ट्रात सहकार चळवळीत भक्कमपणे उभारी घेत असलेल्या खारवी समाज विकास नागरी सहकारी पतसंस्थेच्या दाभोळ शाखेचा उद्घाटन सोहळा अतिशय थाटात संपन्न झाला. महाराष्ट्र राज्य पतसंस्था फेडरेशनचे कार्याध्यक्ष तथा स्वामी स्वरूपानंद पतसंस्था अध्यक्ष अॅड.श्री.दीपक पटवर्धन यांच्या हस्ते व सौ.स्मिता जावकर, सौ.संगिता दाभोळकर, सहाय्यक निबंधक श्रीमती तृप्ती उपाध्ये व श्री रविंद्र नाटेकर यांच्या उपस्थितीत सकाळी ११.३० वाजता ढोलताशांचा गजरात उद्घाटन सोहळा संपन्न झाला. संस्थेच्या अंतर्गत कार्यालयाची पाहणी करताना सर्वच पाहुण्यांनी गौरवोद्गार काढले.
यानंतर दाभोळ पंचक्रोशीतील समाजबांधव व हितचिंतक यांचा सभासोहळा श्री दत्तमंदिर, वरचा विभाग, दाभोळ येथे संपन्न झाला. उपस्थित सभेची गर्दी पाहून कार्यक्रमाचे अध्यक्ष अॅड. दीपक पटवर्धन यांनी अशा उद्घाटन सोहळ्याला एवढी गर्दी पाहून मी अवाक झालो अशी प्रतिक्रिया नोंदवली. तर संस्था चालविण्यासाठी आवश्यक गोष्टींचे मार्गदर्शन करताना खारवी समाज नागरी पतसंस्थेचे भविष्य उज्ज्वल असल्याचे मत व्यक्त केले. समाजाला प्रगतीपथावर नेण्यासाठी संचालक मंडळ काम करत असल्याचे नमुद करून सर्वांचे त्यांनी अभिनंदन केले व पुढील वाटचालीसाठी शुभेच्छा दिल्या.
दाभोळ येथे शाखा झाली ही आमच्यासाठी अभिमानाची गोष्ट आहे, ही शाखा चालवण्याची पालक म्हणून आम्ही जबाबदारी घेत असून सर्वातोपरी सहकार्य करण्याचे अभिवचन दर्यावर्दी मच्छीमार खारवी समाज संस्था अध्यक्ष रविंद्र नाटेकर यांनी दिले. दाभोळ ग्रामपंचायत सरपंच सौ.संगीता दाभोळकर, माजी पंचायत समिती सभापती स्मिता जावकर, सहायक निबंधक तृप्ती उपाध्ये यांनी एकूणच संस्थेची यशस्वी वाटचाल सहकार चळवळीत दृढ करण्याकरिता सर्व सभासद, संचालक मंडळ सदस्य यांनी वेळोवेळी जास्तीत जास्त शिक्षण व प्रशिक्षण घेत राहिले पाहिजे. पतसंस्था आपल्या दारी या विशेष उपक्रमाचे कौतुक करत असताना दाभोळ शाखेला आमचे सहकार्य राहील अशी ग्वाही दिली.
संस्थेचे अध्यक्ष संतोष पावरी यांनी प्रास्ताविक करताना संस्थेचा चढता आलेख हा समाजबांधव व सभासदांचे सहकार्यामुळेच शक्य झाले आहे यामुळेच आम्ही सर्व संचालक, प्रशासकीय अधिकारी व समन्वय समिती सदस्य हे धनुष्यबाण पेलवत आहोत. असेच सहकार्य सर्वांकडून अपेक्षित असून उर्वरित मंजूर झालेल्या शाखा लवकरच आम्ही सुरू करू असे जाहीर केले.
कार्यक्रमाचे सूत्रसंचालन संस्थेचे उपाध्यक्ष श्री.सुधीर वासावे यांनी केले, तर आभार प्रदर्शन संचालिका सौ दिप्ती कोळथरकर यांनी केले. खारवी समाजाची पतसंस्था दाभोळ गावात सुरू होऊन खऱ्या अर्थाने एक पाऊल आर्थिक सक्षमतेकडे पडत असल्याने पंचक्रोशीतील सर्वांनी समाधान व्यक्त केले.
