( रत्नागिरी / प्रतिनिधी )
आठवडाबाजार येथील झोपडपट्टीच्या बाजूला उभा करुन ठेवलेला टेम्पो अज्ञाताने चोरुन नेल्याची घटना 6 डिसेंबर रोजी रात्री 11 ते 7 डिसेंबर रोजी सकाळी 6 वाजण्याच्या सुमारास घडली. याबाबतची फिर्याद केरु आनंद गोसावी (42, भंगार व्यवसाय, आठवडाबाजार, रत्नागिरी) यांनी शहर पोलीस ठाण्यात दिली.
पोलिसांनी दिलेल्या माहितीनुसार, केरु गोसावी यांनी आपल्या मालकीचा टाटा झिप कंपनीचा टेम्पो आठवडा बाजार येथील झोपडपट्टी समोरील रस्त्यावर उभा करुन ठेवला होता. मात्र टेम्पोची चावी त्यांनी काढून नेली नव्हती. अज्ञाताने याच संधीचा फायदा घेत चावी लावून ठेवलेला 35 हजार रुपयांचा टेम्पो चोरुन नेला.
केरु गोसावी यांनी शहर पोलीस ठाण्यात दिलेल्या फिर्यादीनुसार पोलिसांनी अज्ञातावर भादविकलम 379 नुसार गुन्हा दाखल केला आहे.
