(संगमेश्वर)
तालुक्यातील देवरुखनजीकच्या वाशी गावातील सावंतवाडी येथे एका गोठ्यावर वीज पडून गोठा कोसळून तीन जनावरांचा जागीच मृत्यू झाला. यामध्ये २ बैलांसह एका दुभत्या गायीचा समावेश आहे. ही घटना सोमवारी रात्री घडली असून, २ बैल आणि ३ गायी जखमी झाल्या आहेत. यामध्ये सुमारे १ लाख ६० हजारांचे नुकसान झाले आहे.
संगमेश्वर तालुक्यात गेल्या तीन- चार दिवसांत कांजिवरा, तुळसणी, आंबवली, कोंड्ये या ठिकाणी वीज पडून नुकसान झाले होते. या घटना ताज्या असतानाच वाशी गावातील सावंतवाडी येथे दत्ताराम गोविंद पेंढारी यांच्या मालकीच्या गोठ्यावर वीज पडून गोठा कोसळला. यामध्ये २ बैल आणि एक दुभती गाय दगावली आहे. तसेच २ बैल आणि ३ गायी जखमी झाल्या आहेत.
स्थानिक ग्रामस्थांच्या सहकार्याने आपत्तीमधील जखमी जनावरांना सुखरूप बाहेर काढण्यात आले. याचा पंचनामा तलाठी द्वारकेश तायडे, ग्रामसेवक समीक्षा मोहिते, सरपंच सुनील सावंत, ग्रामपंचायत सदस्य अनुष्का सावंत आणि ग्रामस्थ यांच्या उपस्थितीत करण्यात आला.
