(संगमेश्वर / एजाज पटेल)
संगमेश्वर तालुक्यातील वांद्री कुणबीवाडी येथील 25 वर्षीय प्रथमेश दत्ताराम सनगरे याने राहत्या घराच्या खोलीत लाकडी भालाला नायलॉन साडी बांधून त्याचा फास आपल्या गळ्याला लावून आत्महत्या करून स्वतःची जीवनयात्रा संपवली.
प्रथमेश हा पुणे येथे अभियांत्रिकी च्या शेवटच्या वर्षाचे शिक्षण घेत होता. तो सोमवारी 9 फेब्रुवारी रोजी वांद्री या त्याच्या गावी आला होता. त्याने दुसऱ्याच दिवशी मंगळवारी दुपारी अडीच वाजण्याच्या सुमारास घरात कोणीही नाहीत ही संधी साधून घरातील खोलीत असलेल्या लाकडी भालाला नायलॉन ची साडी बांधून स्वतःच्या गळ्याला फास लावून आत्महत्त्या केली.
प्रथमेश याने गळफास लावल्याची माहिती संगमेश्वर पोलिसांना मिळताच संगमेश्वर पोलीस ठाण्याचे पोलीस उपनिरीक्षक चंद्रकांत कांबळे, पोलीस उपनिरीक्षक शंकर नागरगोजे, पोलीस हवालदार सासवे, कॉन्सटेबल लोखंडे, आटोळे, बिक्कड, पोलीस चालक सचिन जाधव हे घटनास्थळी पोहचले. यावेळी पोलिसांना त्या ठिकाणी आत्महत्या करण्यापूर्वी प्रथमेश याने लिहून ठेवलेली चिट्ठी सापडली. या चिट्ठीत उच्च शिक्षण घेतलेले असताना नोकरी नसल्याने जीवन्यात्रा संपवत असल्याचे लिहिले आहे.
प्रथमेश याच्या मृतदेहाचे शवविच्छेदन संगमेश्वर येथील ग्रामीण रुग्णालयात डॉ. मोरे यांनी केल्यानंतर नातेवाईकांच्या ताब्यात मृतदेह सोपवण्यात आला. संगमेश्वर पोलीस ठाण्यात आत्महत्याची नोंद करण्यात आली असून अधिक तपास पोलीस निरीक्षक अमित यादव यांच्या मार्गदर्शनाखाली पोलीस उपनिरीक्षक राजेश शेलार करीत आहेत.
हरहुन्नरी आणि मनमिळाऊ वृत्ती आणि सदैव हसखमुख चेहऱ्याचा, कुटुंबाची जबाबदारी स्वतः पेलण्यासाठी अभियांत्रिकी शिक्षण घेत असताना असे काय बरे त्याचे मनात आले याबाबत पुसटशी कल्पनासुद्धा कोणाला न देता त्याने टोकाची भूमिका घेत स्वतःची जीवनयात्रा संपवण्याचा निर्णय त्याने घेतला. त्याच्या या धक्कादायक निर्णयामुळे सर्वत्र हळहळ व्यक्त होत आहे.
