(चिपळूण)
तालुक्यातील कळंबस्ते मेटकरवाडी येथील १९ वर्षीय युवकाचा रेल्वेची धडक बसून मृत्यू झाल्याची घटना मंगळवारी सकाळी ७:१५ वाजण्याच्या सुमारास कळंबस्ते ठिकाणी घडली. सिद्धेश राजाराम शिगवण (१९, कळंबस्ते, मेटकरवाडी) असे मृत तरुणाचे नाव आहे.
याबाबतची खबर रोहित बाबासाहेब पाटील (रेल्वे पोलिस) यांनी दिली आहे. सिद्धेशला कोचिवली ते चंडीगड जाणाऱ्या केरळ संपर्क क्रांती एक्स्प्रेस या रेल्वेची कळंबस्ते येथे धडक बसली. या घटनेची माहिती चिपळूण पोलिसांना समजल्यानंतर ते घटनास्थळी गेले होते. याप्रकरणी चिपळूण पोलिस स्थानकात आकस्मिक मृत्यूची नोंद करण्यात आली आहे. याबाबत चिपळूण पोलिस अधिक तपास करत आहेत.
सिद्धेश घटनास्थळी काय करत होता, याची माहितीही चिपळूण पोलिस घेत आहेत. केवळ १९व्या वर्षी सिद्धेशची प्राणज्योत मालवल्याने गावात हळहळ व्यक्त केली जात आहे.
