सीआरझेडच्या निकषात राजकीय नेत्यांना टार्गेट करताना किनारपट्टीवरील पारंपरिक व्यावसायिकांना उध्वस्त करू नका

राज्यात शिवसेना काँग्रेस राष्ट्रवादी या तीन राजकीय पक्षाची महाविकास आघाडी दीड वर्षांपासून सत्तेत आल्यापासून भाजपचे काही नेते वेगवेगळ्या नेत्यांना टार्गेट करण्यातच गुंतले आहेत.या मध्ये डॉ. किरीट सोमय्या यांनी तर आमच्या कोकण किनारपट्टीवर लक्ष केंद्रित करून सीआरझेड हाच मुद्दा पुढे करत सरसकट तक्रारीचा सपाटाच लावला आहे. खरतर राज्यातील शिवसेना नेत्यांना टार्गेट करताना आमच्या मूळ पारंपरिक व्यवसाय करणारे सुद्धा यामध्ये गुंतवले आहे. त्यांच्यासमवेत गुहागरचे माजी आमदार डॉ विनय नातू यांचा  उघडपणे सहभाग दिसतोय. डॉ. नातू हे सुसंस्कृत व अभ्यासु आहेत. ते कोकणी माणसाच्या प्रत्येक अडीअडचणी काय आहेत हे चांगलेच जाणतात, असे असताना देखील ते डॉ. सोमय्या यांच्या प्रत्येक तक्रारी दाखल करताना हजर होते. कोकणातील पर्यटन वाढीसाठी त्यांचे वडील स्व. तात्यासाहेब नातू नेहमीच आघाडीवर असायचे स्व.तात्यासाहेब नातू यांचे कार्य सुद्धा महान असल्यामुळेच गुहागरवासियांनीच स्व. तात्यासाहेबांसह डॉ विनय नातू यांना अनेक वर्ष आमदार म्हणून निवडून दिले व त्याच नातूंनी कोकणाच्या पर्यटनावर प्रश्नचिन्ह निर्माण करावे याचेच आश्चर्य वाटते अशा शब्दात श्री. कदम यांनी नाराजी व्यक्त केली.

डॉ किरीट सोमय्या, डॉ. विनय नातू यांनी केलेल्या वेगवेगळ्या तक्रारीमुळे मुरुड किनारपट्टीवरील अनेकांना सीआरझेडच्या नोटिसा आलेल्या आहेत. खरतर गेल्या अनेक पिढ्यानपिढ्या येथे राहणाऱ्या व वेगवेगळ्या पद्धतीने व्यवसाय करणार्यांना आलेल्या नोटिसा ज्या राजकीय नेत्यांना टार्गेट करण्यासाठीच खटाटोप केला जात होता. त्याचा त्रास स्थानिक व्यावसायिकांना होऊ नये यासाठीच मी सरपंच-ग्रामस्थ या शिष्टमंडळाला सोबत घेऊन जिल्हाधिकारी लक्ष्मीनारायण मिश्रा यांची भेट घेऊन त्यांना सर्व हकीकत सांगणार असून या सर्व राजकीय श्रेयवादात कोकणपट्टी उद्धवस्त करू नका अशी विनंती करणार असल्याचे श्री. कदम यांनी सांगितले.