( संगमेश्वर / प्रतिनिधी )
रत्नागिरी कोल्हापूर महामार्गावरील साखरपा येथे दुचाकीच्या अपघातात एक जागीच ठार तर अन्य दोनजण गंभीर जखमी झाल्याची घटना आज शुक्रवारी सायंकाळच्या सुमारास घडली. विजय जाधव (५०, साखरपा) असे ठार झालेल्या दुचाकीस्वाराचे नाव आहे. तर सविता विजय जाधव,अजय विजय जाधव अशी गंभीर जखमी झालेल्या दोघांची नावे आहेत.
सविस्तर वृत्त असे की, विजय जाधव हे आपल्या दुचाकीवरून तीन सीट घेऊन कोल्हापूरहून संगमेश्वरच्या दिशेने येत होते. यावेळी साखरपा येथे आले असता त्यांचा गाडीवरील ताबा सुटला. त्यांच्या दुचाकीला अपघात झाला. या अपघातात दुचाकीस्वार विजय जाधव यांचा जागीच मृत्यू झाला तर पत्नी सविता जाधव, मुलगा अजय जाधव हे गंभीर जखमी झाले. अपघाताची माहिती मिळताच साखरपा पोलिस घटनास्थळी दाखल झाले. जखमी दोघांना साखरपा प्राथमिक आरोग्य केंद्रात उपचारासाठी दाखल करण्यात आले. मात्र प्रकृती अधिक खालावल्याने त्यांना रत्नागिरी जिल्हा रुग्णालयात उपचारासाठी दाखल करण्यात आले आहे. रात्री उशिरा पर्यंत पंचनामा करण्याचे काम सुरू होते.
