( चिपळूण / प्रतिनिधी )
तालुक्यातील सहयाद्री पॉलिटेक्निक कॉलेजच्या गेट ते वहाळफाटा रस्त्यावर संगमेश्वरातील तरुणाला दोघांनी लाथाबुक्क्यांनी मारहाण केल्याची घटना घडली. गणेश विचारे व अन्य दोन (पूर्ण नाव, पत्ता माहित नाही) अशा तिघांवर गुन्हा दाखल करण्यात आला आहे. याबाबतची फिर्याद प्रणव सुरेश चव्हाण (19, मूळ संभाजीनगर, संगमेश्वर, सध्या भाडयाने वहाळफाटा वारेचाळ, चिपळूण) याने चिपळूण पोलीस ठाण्यात दिली. ही घटना 13 डिसेंबर रोजी दुपारी 2 वाजण्याच्या सुमारास घडली.
पोलिसांनी दिलेल्या माहितीनुसार, प्रणव चव्हाण हा चिपळूण येथे कॉलेज शिकतो. चिपळूणात तो भाडयाने आहे. तेथेच एका घरगुती खानावळीमधून रुममेटमधील मुलांचे डबे घेवून येत असताना गणेश विचारे याने दारुच्या नशेत तुला कळत नाही का असे बोलून दमदाटी केली. शिवीगाळही केल्यामुळे प्रणव हा आपल्या मित्रांसह पोलीस स्टेशनला फिर्याद देण्यासाठी निघाला. यावेळी संशयित गणेश विचारे सोबत असलेल्या अन्य दोघांनी प्रणव व त्याच्या मित्राला लाथा बुक्क्यांनी मारहाण करण्यास सुरुवात केली. शिवीगाळ करत हाताच्या थापटाने मारहाण केली.
या मारहाणीची तक्रार प्रणव याने पोलीस स्टेशनला दिल्यानंतर पोलिसांनी गणेश विचारे व त्याच्यासोबत असलेल्या अन्य दोन जणांवर भादविकलम 324, 323, 504, 506, 34 अन्वये गुन्हा दाखल केला.
