(चिपळूण/प्रतिनिधी)
शनिवार ९ एप्रिल २०२२ रोजी सकाळी १०. ३० वाजता श्रमिक कृषि संवर्धन संस्था, आरवली या संस्थेमार्फत सह्याद्री शिक्षण संस्थेच्या फुरुस येथील शावजीराव लक्ष्मणराव निकम विद्यालयातील २२ विद्यार्थ्यांना सायकल वाटपाचा कार्यक्रम पार पडला.
श्रमिक कृषी संवर्धन संस्था ही वेगवेगळे सामाजिक उपक्रम राबवित असते.
विलास होडे स्मृती वाचनालय हे १५ ऑगस्ट २०२० रोजी चालू झाले असून आता दीड वर्ष पूर्ण झालेली आहे. या वाचनालयाच्या माध्यमातून संविधान दिन, स्पर्धा परीक्षा मार्गदर्शन, नवनिर्वाचित ग्रामपंचायत सदस्यांना ‘पंचायतराज’ यावर मार्गदर्शन, महामानवांवर निबंध स्पर्धा व क्रांतीज्योती सावित्रीबाई फुले जयंतीनिमित्त राज्यस्तरीय निबंध व कविता स्पर्धा, देहदान कार्यक्रम इत्यादी उपक्रम आयोजित करण्यात आले होते. असे नाविन्यपूर्ण उपक्रम ही संस्था राबवित असते, आता एक उपक्रम या संस्थेने हाती घेतला असून फुरुस हायस्कूलमध्ये शिकणारे विद्यार्थी दुर्गवाडी, कोसबी, मुंढे, मंजोत्री, येगाव अशा दुर्गम भागातील विद्यार्थी शिक्षणासाठी ८ ते ९ किलोमीटर पायपीट करुन येतात. तसेच सध्या एस.टी. कर्मचाऱ्यांचा संप असल्याने विद्यार्थ्यांची पायपीट लक्षात घेऊन संस्थेचे संस्थापक अध्यक्ष विलासजी डिके यांनी सायकल वाटप करण्याचा निर्णय घेतला.
या सायकल वाटपास मोलाचे आर्थिक सहाय्य डॉ. श्यामकांत गजमल, मा. विद्या दळवी, वसंतशेठ उदेग, विलासशेठ खेराडे, निवृत्त पोलिस निरीक्षक रमेश घडवले, प्रमोद गजमल, डॉ. प्रकाश पाटणकर, पी. टी. करावडे, जी. एस. खांबे, अरूणशेठ गजमल, वैभव कोरगांवकर, समीर गजमल, मा. जी.एस.खांबे, मा.प्रताप गजमल, मा. अनंत शिगवण गुरुजी व कृष्णा बेटकर इत्यादींनी केले.
या सायकल वाटप कार्यक्रमाला कोकणचे गाडगेबाबा प्रबोधनकार मा. मारुतीकाका जोयशी, जलनायक मा. युयुत्सु आर्ते, सावर्डे पोलिस ठाण्याचे पोलिस निरीक्षक भरत धुमाळसाहेब, श्रमिक कृषी संवर्धन संस्थेचे अध्यक्ष विलासजी डिके, अनंत शिगवण गुरुजी, नितेश दुर्गोळी, प्रा. संदिप येलये, सुरेश गांगरकर, अनिल घाणेकर, फुरुस गावचे सरपंच मा. दादा कदम, हायस्कूलचे मुख्याध्यपक कल्पेश दळवी इत्यादी मान्यवर व शिक्षक, कर्मचारी, विद्यार्थी उपस्थित होते.
